Is dit nie tyd dat ons leeskring mans ook moet uitnooi om aan te sluit nie?
Op 3 September 1969 het agt vroue van Mosselbaai by die huis van Annette Meyer vergader. Dit was die amptelike begin van die Mosselbaaileeskring.
Vandag, 50 jaar later, floreer dié leeskring steeds en Vrydag, 8 November het 20 vroue vergader om dié geleentheid te vier. Annette, wat die groot gees was agter die totstandkoming van die leeskring, is die enigste van die oorspronklike agt lede wat steeds lid is en daarom ’n erelid.
Die aanvanklike stigting het geskied met die entoesiastiese aanmoediging van die skrywers Audrey Blignault en Dalene Matthee.
“Leeskringlede het in die jare 70 soms heftig verskil oor die rol van die mens agter die boek en die taalgebruik van die Sestigers,” onthou Annette Meyer. Daar was byvoorbeeld ’n geleentheid waar Cynthia Zietsman, Breyten Breytenbach se bundel Die ysterkoei moet sweet bespreek het en ‘n spesifieke woord in die bundel ’n lid so onstel het, dat sy bedank het. Lewendige besprekings is trouens ’n kenmerk van die byeenkomste en die leeskring is met reg trots op die hoë standaard van die besprekings.
’n Wye spektrum van boeke is deur die jare bespreek. Sedert die stigting is daar trouens al meer as 500 titels behandel. Elke lid kry ’n beurt om ’n boek te bespreek en daar is geen beperking op die keuse, tema of taal van boeke nie. Behalwe letterkundige werke, is onder meer kuns, argitektuur, musiek, vertalings van klassieke werke, godsdiens en mitologie bespreek.
Een jaar is die besprekings gewy aan boeke van swart Suid-Afrikaanse skrywers. Deesdae word meer, maar nie uitsluitlik nie, Afrikaanse boeke bespreek, danksy die beskikbaarheid van ’n oorvloed puik Afrikaanse publikasies.
Die ledetal word tot 20 beperk omdat byeenkomste by lede se huise is, waar nie altyd baie ruimte is nie. Annette Meyer gooi egter ’n klip in die bos: “Is dit nie tyd dat ons leeskring mans ook moet uitnooi om aan te sluit nie?”
Die mikpunt van die leeskring is dat elke lid ’n beurt kry om ’n boek te bespreek.
Soms word skrywers genooi om oor hul eie werk te praat. So was daar deur die jare, benewens Dalene Matthee, ook Marié Heese, PG du Plessis, Petrovna Metelerkamp en John Kannemeyer. ’n Hoogtepunt vroeër vanjaar was toe Riana Scheepers haar jongste boek, Stormkind, kom bespreek het.
Die leeskringbyeenkomste word ook gekenmerk deur vrolike kuiers om die teetafel met die wonderbaarlikste verversings. Die maandelikse byeenkomste bly elke maand ’n hoogtepunt.