Onbillike optrede van munisipaliteit
Rensen, skryf:
My munisipale rekeninge word gewoonlik per gewone pos aan my gestuur. Meimaand het ek nie ’n rekening ontvang en gevolglik is die rekening nie betaal nie. Vandag is dit 3 November en ek het steeds nie my rekening ontvang nie. Die volgende maand het ek ook nie ’n rekening ontvang en het by die munisipalekantoor een gaan aanvra.
Op die rekening merk ek dat daar ’n adminfooi van R78 gehef is. Volgens Mosselbaai-munisipaliteit is dit gehef omdat my vorige rekening nie betyds betaal is en is dit die verbruiker se plig om seker te maak dat ’n rekening ontvang word. Die munisipaliteit kan nie verwag dat rekeninge betyds betaal word as hulle nie daarin kan slaag om dit betyds af te lewer en dan nog die vermetelheid het om te verwag dat die verbruiker ’n heffing moet betaal oor hulle versuim.
Hulle tariewe maak geen melding van ’n adminfooi wat gehef kan word maar wel dat rente op uitstaande rekeninge gehef kan word. As rente op die uitstaande rekening van R703 gehef word sou dit ongeveer R7 beloop teen 12% rente/jaar. In hierdie geval beloop die adminfooi ’n rentekoers van sowat 120%/jaar wat ’n oortreding van die Woekerwet is. Normale praktyk is dat 30 dae grasie gegee word vir betaling van rekeninge maar
dit geld blykbaar nie in die geval van Mosselbaai-munisipaliteit.
Die firma wat namens die munisipaliteit die rekeninge uit stuur doen nie hulle werk nie, maar is gou om ’n aanmaning te stuur dat die rekening
agterstallig is. Die skuld kan ook nie op die poskantoor gepak word omdat ek al my ander rekeninge gereeld in die pos kry. Die Verbruikersbeskermingswet beskerm die verbruiker teen onbillike besigheidspraktyke van besighede soos in die geval. 'n Verskaffer mag nie afstand doen van enige aanspreeklikheid van die verskaffer soos om die onus op die verbruiker te plaas om ’n rekening te kry. Mosselbaai-munisipaliteit oortree dus die wet met hierdie optrede. Mosselbaai-munisipaliteit reageer: Mosselbaai-munisipaliteit lees maandeliks meters vanaf die 15de van ‘n maand, tot die 10de van die volgende maand volgens ‘n leesskedule. Munisipale rekeninge word elke maand tussen die 19de en 21ste gehef.
Rekeninge word tussen die 22ste en die 24ste van ‘n maand gegenereer en aan die drukkers gestuur om rekeninge te druk. Die drukkers moet binne drie dae die rekeninge by die poskantoor lewer vir sortering en verspreiding.
Dit neem die poskantoor gemiddeld drie dae om sortering en verspreiding van rekeninge te doen.
Rekeninge behoort dus tussen die 30ste en 5de van ‘n maand in die posbusse van verbruiker wat posaflewering verkies, te wees.
Juis om te verseker dat daar nie ‘n vertraging in die aflewering van rekeninge is nie, word verbruiker aangeraai om die munisipaliteit van ‘n e-posadres te voorsien om rekeninge en ander kommunikasie van die munisipaliteit elektronies te ontvang.
E-pos verbruikers behoort rekeninge tussen die 25ste en 27ste van ‘n maand te ontvang. Die munisipaliteit stuur aan verbruikers waar ons selfoon nommers het ‘n sms na elke maandelikse heffing met die balanse betaalbaar.
Die betaaldatum is normaalweg die 15de van die maand, tensy dit op ‘n naweek of vakansiedag val, wanneer die betaaldatum aanskuif na die volgende werksdag.
Indien geen betaling ontvang word nie, word rekening wat teen ongeveer die 25ste nog nie betaal het nie oorhandig vir invordering - (teen hierdie tyd is dit reeds meer as 30 dae vandat die rekening gehef is en dus al meer as 30 dae uitstaande).
Agter op elke rekening wat gelewer word, word kliënte gemaan om by die munisipaliteit navraag te doen indien hulle nie hul maandelikse rekeninge ontvang nie.
Die munisipaliteit se kredietbeheerbeleid wat deur die raad aanvaar is, stipuleer uitdruklik dat dit die onus van die verbruiker is om ‘n navraag te rig of duplikaatrekening te bekom indien rekeninge nie betyds ontvang word nie.
Die kredietbeheerbeleid bepaal ook die administrasiefooie wat gehef word ingevolge die tariefbeleid.
Uiteindelik bly dit die verantwoordelikheid van die verbruiker om navraag te doen indien maandelikse rekeninge nie ontvang word nie.
Die munisipaliteit het geen beheer oor die aflewering van posstukke nie. Verbruikers word wel versoek om liefs e-pos adresse en selfoonnommers te verskaf vir die elektroniese verspreiding van rekeninge en tydige herinnering van balanse betaalbaar.
Die munisipaliteit versoek verbruikers om enige klagte elektronies by admin@ mosselbay.gov.za te rig. Klagtes word op ‘n sporingstelsel gelaai en verbruikers kry ‘n verwysingsnommer wat vir verdere navrae gebruik kan word, indien nodig.
Die sporingstelsel verseker ook dat alle klagtes aangespreek en opgelos word.