Toeskouers vermaak met rugby
Hordes rugbyliefhebbers het verlede Saterdag, 9 November van heinde en verre na die Albertinia-sportgronde gekom om die eindstryd van die SWD munisipale rugbyuitdaagbeker en voorwedstryde by te woon. Die rugbystadion was vol gepak deur oud en jonk. Hennie Baartman, president van SWD en Francois Davids, adjunk-president van SARU het die geleentheid bygewoon.
Oker Primêr se o/14-meisies het die dag afgeskop met 'n voorwedstryd teen Parkdene Primêr se meisies. Dié wedstryd het 15-15 gelykop geëindig. Daarna het Albertinia Hoërskool se o/15 seuns 'n oorwinning van 24-12 oor Hillcrest Sekondêre skool behaal.
Rangers Albertinia het met 'n gemengde span die Black Dolphins van Gouritsmond met 20-7 plat gehardloop. Die jong manne, Bendré Basson, Adriaan Bauwer en Dean
Malherbe van Kwaggas (George) het ook vir die Black Dolphins uitgedraf.
Sentraal Karoo en Bitou het die skildfinaal op 'n hoë noot afgeskop en die skare met harde en pragtige hardlooprugby vermaak. Sentraal Karoo het die wedstryd naelskraap met 39-32 gewen. Manne van die Karoostreek het nie verniet so ver gereis nie en seker gemaak hulle stap met die skild huis toe.
Die hoofwedstryd tussen Mosselbaai en George was die hoogte punt van die dag. Beide spanne het mekaar behoorlik die stryd aangesê en mekaar voor en agter karnuffel. Aan die einde was dit die manne van Mosselbaai wat met die SWD munisipale uitdaagbeker uit die stryd getree het. Hulle het die George munisipalespan oortuigend met 42-24 geklop.
* Lees berig oor Mosselbaai versus George wedstryd op agterblad.