Eden behaal goud
Die eerste georganiseerde vriendskaplike jukskeiwedstryd tussen twee spanne het op 4 November 1939 op die plaas Keerweder in die distrik Paarl plaasgevind. Tot en met 1990 het jukskei ontwikkel tot die 18de grootste sportsoort uit ‘n totaal van 113 in Suid-Afrika.
Sedertdien het jukskei geleidelik getaan, vanweë die feit dat ander sportsoorte waaronder rugby, krieket, tennis, gholf en nog andere meer belangstelling van veral skoolleerders getrek het. Jukskei is nie ‘n mededingende wêreldsportsoort nie en word hoofsaaklik in Suid-Afrika en Namibië beoefen.
Wes-Kaap het verlede Saterdag vroegtydig die 80ste bestaansjaar van georganiseerde jukskei gevier. Dié viering het op Worcester plaasgevind waar verskeie distrikte waaronder Eden, Kaapse Wynlande, Overberg en die WP verteenwoordig was.
Dit was voorwaar ‘n besondere feesgeleentheid. Spelers van weleer is begroet met ‘n erewag gevorm deur die veel jonger garde.
Die president van Jukskei Suid-Afrika, Nico Nel, het die belangstellende teenwoordiges toegespreek.
Hoewel die groei van jukskei enersyds beklemtoon is, is daar egter ook kommmer uitgespreek oor die afname van belangstelling in jukskei veral deur skoolleerders en gevolglik die jonger geslag. As die spel nie op ‘n vroeë ouderdom aangeleer en bemeester word nie, vervaag belangstelling en verminder die deelnemers.
Spelers uit verskillende klubs het spanne verteenwoordig in A-, B- en C afdelings. ‘n Algehele ontspanne atmosfeer het geheers aangesien die hoofdoel was om die dag as ‘n feesdag te beleef. Tog het spanne mekaar deeglik getoets en die vermoeëns van spelers tot die uiterste beproef.
Daar was goud, silwer en brons medaljes op die spel vir die eerste drie plekke in elke afdeling. Dit was uiteindelik goeie motivering om die beste uit elke speler te haal. Aan die einde van die dag se spel is die volgende spanne (eerste drie plekke) bekroon vir hul prestasies.
A-afdeling:
Eden (goud); Visarende (silwer); Pikkewyne (brons).
B-afdeling:
WP (goud); Eden (silwer); Overberg (brons).
C-afdeling:
Visarende (goud); Worcester C1 (silwer); Eden (brons).
Die landswye feesvieringe vir die 80ste bestaansjaar van georganiseerde jukskei vind gedurende die week van die 21 tot 28 Maart 2020 in Kroonstad plaas. Alle belangstellendes word hartlik uitgenooi na die geleentheid.