Stilbaaiers palm trofee in
Daar word elke jaar in November tussen die Suid-Kaap Sagesspelers meegeding om die Hennie Huysertrofee.
Die wenners van die trofee is dan die amptelike beterbalkampioene van die betrokke jaar, ‘n status wat hulle behou tot die volgende jaar November. Vanjaar is die trofee ingepalm deur twee Stilbaaiers, Pat Tavener en Dirk Bosman. Baie geluk julle twee.
Die beterbalkompetisie het op Dinsdag, 5 November op Stilbaai plaasgevind. ‘n Groot groep van 64 spelers het kom meeding en die plaaslike spelers het behoorlik die tuisveldvoordeel gebruik en die eerste drie posisies ingeneem. Baie dankie aan die Stilbaai-gholfklub wat soos altyd goedgeorganiseerd en baie gasvry die groot groep spelers ontvang en trakteer het. Dis regtig ‘n plesier om daar te kan speel.
Uitslae
Die volgende pare het die beste stablefordpunte aangeteken (die uittelstelsel vir spelers wat dieselfde punte het werk op die hoogste ouderdom):
1. Pat Tavener en Dirk Bosman (Stilbaai) 46 (Hennie Huysertrofeewenners); 2. Danie Marais en Tony Postma (Stilbaai) 46; 3. Dave en Melinda Gravett (Stilbaai) 46; 4. Errol en Leatitia Higgs (voornemende Sageslede van Mosselbaai) 45; 5. Jimmy Sherman en Billy van der Westhuysen (Stilbaai) 43; 6. Jaco Swanepoel en Josef Botes (Riversdal) 41; 7. Nic Marais en Gert Pieterse (Mosselbaai) 40; 8. Ricky May en Frik Putter (Stilbaai) 39.
Die naaste aan die penne is gewen deur Thys Cronje van Stilbaai op 2/11 en Dawie le Roux van Heidelberg op 8/17. Baie dankie aan JC Slaghuis van Riversdal vir die borg van die twee pryse.
Baie dankie ook aan Celia Hart wat twee gholfhanddoeke gemaak het wat as pryse oorhandig is.
Die laaste Sagestoernooi van die jaar is die IPS -kompetisie wat op 26 November op Heidelberg plaasvind. Daar ontvang die wenner die Bertus Louwtrofee.
By die geleentheid vind die algemene jaarvergadering van die Suid-Kaap Sages ook plaas en spelers word aangemoedig om dit by te woon.