Matriekseun bots voor vraestel
‘n Matriekleerder van die Hoërskool Punt was op Woensdag, 13 November op Louis Fourieweg in 'n botsing betrokke.
Die ongeluk het net na 07:30 gebeur toe Tyron Casey (18), wat op pad was om sy vraestel te skryf, in die nat weer met sy bromponie teen die agterkant van 'n Nissanbakkie gebots het. Die voorval het by die indraai na die Mosselbaai-landdroshof gebeur. Tyron se ma, Henriëtte het aan die
Mossel Bay Advertiser gesê dat Tyron haar vertel het dat hy nie erg seergekry het nie, maar toe hy van sy bromponie afval, het hy in die aankomende baan beland waarna 'n donkerblou Hyundai, oor sy bene gery het.
Die Hyundai, wat volgens 'n ander ooggetuie deur 'n man bestuur is, het van die toneel af weggejaag. Tyron se bobeen is in die proses gebreek. Twee van Tyron se skoolmaats het gesien hoe die Hyundai oor sy bene gery het," vertel Henriëtte. Nooddienste van ER24, EMS, By Grace, die verkeersdepartement en die brandweer was spoedig op die toneel.
Henriëtte vertel Tyron het gesê: "Mommy I will never forget that moment when I saw the blue Hyundai coming straight at me."
Ná die ongeluk was die geskokte Henriëtte self op die toneel en is deur paramedikus, Juan Barnard van By Grace-ambulansdiens bygestaan en vertroos.
Oorgeplaas na George
Henriëtte vertel dat haar man nege jaar gelede op 13 Oktober oorlede is en dat sy haar kinders alleen grootgemaak het. Tyron is deur ER24 na die hospitaal geneem vir behandeling.
Hy is later na George oorgeplaas vir 'n operasie waar sy bobeen met plate en skroewe herstel gaan word.
Tyron sou die dag van die ongeluk eksamen geskryf het. Volgens mnr Adolf Gouws, skoolhoof van Hoërskool Punt op Mosselbaai, sal Tyron egter tot Julie aanstaande jaar moet wag om die hereksamen te skryf. Ná die uitslae in Augustus 2020 sal hy eers sy matriekuitslae ontvang. Die hereksamen reëls van die departement van onderwys geld net in drie gevalle: om mediese redes, in die geval van hofverskynings en die dood van 'n ouer/ ouers of 'n naasbestaande. Leerders wat egter sonder dié redes wegbly vir 'n vraestel, mag nie die hereksamen skryf nie.