Kommer oor minderjariges by inbrake betrokke raak
Baie minderjariges word by verskeie van die inbrake wat die afgelope tyd in Heidelberg plaasgevind het, betrek.
Dit is volgens Heidelberg-polisie se kommunikasiebeampte, ao Alroy Windvogel. Hy noem verder dat misdadigers wat danksy die president se spesiale amnestie vrygelaat is, van die minderjariges gebruik maak om inbrake te pleeg. “Die tendens is dat die minderjariges en veral kinders wat nog skoolgaande moet wees, gebruik word om in te breek en die goedere aan hul ouer 'vennote' verskaf wat dit dan van die hand sit.”
Windvogel doen ’n dringende beroep op alle ouers om meer oplettend te wees aangaande hul kinders se gedrag en bewegings, veral in die aande. Hy benadruk ook dat inwoners nie ’n mark vir misdadigers moet skep deur enigiets aan te koop as hulle nie sekerheid het of dit die "verkoper" se eiendom is nie.
Nog ’n kwessie wat dringend aandag benodig, is die toename in geslags- en gesinsgeweld. "Met die begin van die inperking onder vlakke 5 en 4, is veel minder van dié klagtes ontvang. Sedert vlak 3 aangekondig is waartydens alkohol vanaf Maandae tot Donderdae weer gekoop mag word, het hierdie misdade toegeneem."
Meeste van die klaers trek boonop die sake teen hul aanranders terug, wat beteken dat die polisie onnodige tyd aan die ondersoeke spandeer het.
Windvogel doen ’n beroep op die slagoffers om nie die sake terug te trek nie, veral met gesinsgeweld en omdat die gevaar bestaan dat hulle weer onder die aanrander sal deurloop.
Hy rig 'n waarskuwing dat die polisie daadwerklik sal optree teen diegene wat hul skuldig maak aan wat dié soort misdaad teen vrouens, kinders en bejaardes.
Enigeen met inligting kan die polisiestasie (028 722 1910/028 722 8227) of Windvogel (082 522 1245) skakel.