Geredigeerde Mosselbaaise belasting
Mosselbaaise sakeman, skryf:
Met die oornag koms van Covid-19 lockdown het alle besighede, restaurante, gastehuise, hotelle ensomeer se honderde miljoene rande maandelikse inkomste oornag gekrimp na nul.
Eiendomswaardes waarop belasting bepaal en gehef word het ook oornag gedaal na nul. Geen hotel, gastehuis, restaurant, besigheidsgebou, ensomeer het enigsins enige waarde nie. Niemand sal dit koop nie. Baie sal en kan nooit weer oopmaak nie. Die vooruitsig na selfs ‘n 10 tot 20 persent herstel in die nabye toekoms en tot oorlewing blyk skraal te wees.
Duisende mense in hierdie bedrywe het oornag werkloos geword, met weinig hoop tot her-indiensneming. Dit sal jare neem voor, indien ooit, Mosselbaaise besighede, veral in die toerisme- en restaurantbedrywe sal herstel tot die norm van Februarie 2020. Die munisipaliteit het gesluit, behalwe vir ‘n paar noodsaaklike dienste, met uiters beperkte personeel. Sy amptenary sit by die huis en kry steeds volle salaris sonder enige sprake van salaris vermindering en afleggings.
Word daar deur die munisipaliteit verwag dat hierdie besighede wat tot stilstand gekom het, steeds belasting moet betaal en indien wel, tot watter persentasie en waarom so? My persoonlike gevoel is dat daar ‘n onmiddelike klasaksie teen die munisipaliteit ingestel moet word, wat aandring op totale her-waardasie van alle eiendomme en aandrang op die drastiese vermindering van munisipale werkers en veral hul buitensporige salarise, gegewe pandemie omstandighede die efek daarvan.
Hoe op aarde kan besighede hul munisipale verpligtinge nakom met geen, of tot 10 tot 20 persent van die normale omset?
Kommentaar van Mosselbaaimunisipaliteit:
Mosselbaai-munisipaliteit het erns met die verlies aan inkomste wat beide besighede en individuele inwoners weens die Covid-19 pandemie ly. Daarom het die munisipaliteit op 22 April reeds in die formele media soos die Mossel Bay Advertiser, radiostasies en via sosiale media - en by herhaling daarna - aan alle betalers van munisipale rekeninge die geleentheid gebied om reëlings te tref vir die betaling van munisipale rekeninge sonder dat enige rente gehef word.
Die munisipaliteit het verskeie hulpmaatreëls vir besighede in plek gestel. Besighede wat by die munisipaliteit huur en besighede wat dienste en belastingrekeninge aan die munisipaliteit betaal, kry die vergunning om die betalings aan die munisipaliteit te struktureer om nóu minder te betaal, maar met die voorbehoud dat alle heffings teen Desember 2020 vol opbetaal sal wees. Geen rente sal vir hierdie periode gehef word op die uitstaande bedrag nie.
Ruim afslag en dienste word ook gebied aan diegene wat as hulpbehoewende en/ of behoeftige persone by die munisipaliteit registreer. Hierdie vergunning geld nie net enkele persone of spesifieke wyke nie. Ook hierdie voordele en aansoekproses is by herhaling en wyd - ook in in hierdie koerant - verduidelik en inwoners is uitgenooi om daarvoor aansoek te doen.
Dienslewering, onder meer vullisverwydering, riool, watervoorsiening, brandweerdienste en dies meer, asook die instandhouding van infrastruktuur daarvoor moet steeds gehandhaaf word en is trouens ononderbroke tydens die nasionale Covid-19-inperkingsproses gelewer. Dienslewering word befonds uit die inkomste wat die munisipaliteit maak uit inkomste van meer vullisverwydering, elektrisiteit en water, asook die heffings op eiendomme, onder meer.
Soos die besighede waarna die leser verwys, het die munisipaliteit insigself ook groot uitdagings om diensleweringsvlakke te handhaaf gegewe 'n merkbare afname in inkomste en verliese op beleggings.
Nie net die munisipale bestuurder nie, maar talle van die senior bestuur het uit vrye keuse hul salarisaanpassings prysgegee; inligting wat ook vroeër aan die gemeenskap gekommunikeer is.
Mosselbaai-munisipaliteit is bekend as 'n omgee-instansie bekend vir uitstaande dienslewering en nooi daarom nie net die briefskrywer nie, maar enige inwoner wat werklik weens die Covid-pandemie in geldnood verkeer, om onverwyld met ons in gesprek te tree.