Vrae oor begrote 400k vir reklamebord

‘n Opposisieparty in die munisipale raad het vandeesweek hulle kommer te kenne gegee oor die goedkeuring van ‘n R400 000begroting vir bemarkingsdoeleindes.

Die item is bespreek tydens ‘n virtuele raadsvergadering wat aan die einde van Junie gehou is. Jeanette Gouws van die ACDP het in ‘n persverklaring ‘n beroep op ander opposisiepartye gedoen om waaksaamheid aan die dag te lê wanneer dit kom by die besteding van belastingbetalers en inwoners se geld.

“Die ACDP is sterk gekant teen die beplande advertensiebord op Louis Fourie. Ons bevraagteken die feit dat die munisipaliteit bemark moet word asof dit ‘n diensverskaffer is en nie ‘n besigheid wat afhanklik is van die verkoop van produkte nie.”

Gouws sê in die verklaring verder dat die begrote fondse eerder in die lig van die effek van die nasionale inperking aangewend kan word, sou daar ‘n humanitêre voedselkrisis ontstaan. In hulle repliek, het die Mosselbaai-munisipaliteit gesê dat daar nog nie finaliteit oor die ligging van die voorgestelde reklamebord is nie. Dit word egter in die vooruitsig gestel dat dorpenaars se voordeel uit die inisiatief, tweeledig sal wees.

“Tereg is die persoon wat navraag gedoen het, bekommerd oor die kwynende plaaslike ekonomie wat die nasionale en trouens internasionale ekonomiese tendense volg. Maar die munisipaliteit het nog altyd die bevordering van die plaaslike ekonomie voorgestaan en het verskeie inisiatiewe geloods om die ekonomie te stimuleer,” het die munisipaliteit se woordvoerder, Nickey le Roux gesê.

Sy het onder meer verwys na die gereelde dorpsfeeste en fasiliteite vir die bevordering van kleinhandelsprojekte. Dit sluit in die Bee Hives in Mosselstraat en die Goods Shed binnenshuise mark.

Waardevolle komponent

“Covid-19 stel ongekende uitdagings wat innoverend benader moet word om die plaaslike ekonomie, asook dié van die distrik te stimuleer. Dit word nie beoog om die reklamebord te gebruik om die munisipaliteit per se te bemark nie, maar om die dorp en sy toerismevoordele aan die groot klok te hang.” Le Roux het ter stawing verwys dat voorbeelde waar buitelugreklame beide in Suid-Afrika en internasionaal met besondere sukses vir hierdie doel aangewend word.

“Daarbenewens word die potentsiaal ondersoek vir die verhuring van die buitelugreklamebord(e) aan die besighede, wat insigself vir die munisipaliteit ‘n inkomste sal bied wat oor ‘n termyn, die oprigtingskoste ver sal oorskadu.”

Volgens Le Roux is buitelugreklame ‘n waardevolle komponent van die bemarkingspakket. Hierdeur word die aantrekkingskrag van Mosselbaai se veelvoud bemarkingswaardige komponente bevorder onder toeriste, asook potensiële beleggers. “Die munisipaliteit het die afgelope paar jaar veral moeite gedoen om goeie verhoudinge te vestig met instansies soos die Mosselbaai Besigheidskamer, die Garden Route Film Office, SCEP, Mosselbaai Toerisme en andere wat ekonomiese sekerheid in die groter munisipale aInnoea help bevorder.

Die munisipale kantoor van plaaslike ekonomiese ontwikkeling doen ook uitstekende werk om investering te bevorder, soos wat die tweelingsooreenkoms met Denpasar in Indonesië kan getuig.”

Le Roux het afgesluit deur te sê dat ‘n ondersoek gedoen word na die moontlike ligging(s) van die buitelugreklamebord(e) en die potensiaal vir die verhuring van reklamespasie aan die kommersiële mark. “Die uitkomste van dié ondersoeke sal aan die raad voorgelê word vir ‘n finale besluit.”

• Lees die ACDP se volledige persverklaring