Marzaan se duiwe vlieg hoog
As jong meisie was haar liefde vir diere haar baie na aan die hart en in haar laerskooldae het dit inderdaad 'n buitengewone wending geneem.
Marzaan van der Linde (14), oud-skolier van Laerskool Park se liefde vir diere is deur die opsigter van Laerskool Park, Wessel van Dyk geprikkel nadat hy met die skool se toestemming om posduiwe begin aanhou. Sodoende het hy by die skool die leerders onderrig in die versorging en ander aspekte van duiwesport.
Marzaan het gereeld by die hokke na die duiwe gaan kyk en dit was nie lank nie, of die gogga het gebyt. Wessel het in 2017 besluit om haar as 'n juniorlid saam met hom te laat vlieg. Met tans 30 duiwe onder haar vlerk, het Marzaan as junior lid van die Mosselbaai-posduifklub reeds verskeie prestasies met haar duiwe ingepalm.
Gedurende die 2019 Eden Posduiffederasie se jaarlikse funksie het sy 15 toekennings ontvang, waaronder 'n eerste plek in die kategorie junior single bird (meeste eerste plekke gevlieg). Haar duiwe het vyf eerste plekke, drie tweede plekke en ses derde plekke gevlieg. Sy is ook genooi na die SANPO-funksie in Maart vanjaar waar sy weer 'n toekenning ontvang het.
Buiten die wedvlugduiwe is sy ook 'n kranige atleet. Marzaan het in 2019 en vanjaar haar Eden-kleure in skyfwerp verower. Sy is baie lief vir die natuur en haar stokperdjie is fotografie. Marzaan is tans 'n graad 8-leerder by Hoërskool Punt en sê dat sy na skool wil studeer om 'n marienebioloog te word.