Wees verantwoordelik, sê Riddles
Hessequa se uitvoerende burgemeester, Grant Riddles sê hy is bekommerd oor die manier waarop sommige inwoners tydens die Covid-19-pandemie optree.
Hy pleit by almal in die groter Hessequa-gebied, wat besoekers insluit, om Covid-19 in 'n ernstige lig te beskou. "Die koronavirus is 'n werklikheid. Ons begin nou al meer ervaar dat die virus nie net 'n statistiek op papier is nie, maar dat ons familie, vriende en kollegas ook positief gediagnoseer word."
Volgens Riddles is hy besorg oor die toenemende aantal bevestigde gevalle in die Hessequa munisipale gebied. "Wanneer ons na die huidige toename kyk, wys dit duidelik dat nie almal hulle samewerking gee nie."
Hy versoek inwoners om hul gedragspatroon te verander, want dis die enigste manier om die verspreiding van Covid-19 te bekamp. "Was jou hande vir ten minste 20 sekondes gereeld met seep of 'n handreiniger met 'n alkoholbasis. Handhaaf 'n persoonlike afstand van ten minste 1.5 meter van ander mense af en dra altyd 'n gesigmasker wanneer jy in die openbaar is."
Hy maan verder ouers en oppassers om te sorg dat kinders nie onnodig hul huise verlaat nie. "Hou hulle tuis en neem verantwoordelikheid vir jou gesin se gesondheid en veiligheid."
Riddles het benadruk Hessequamunisipaliteit is tot die uitwissing van die koronavirus verbind. "Ons sal alle moontlike stappe neem om die regering te ondersteun om ons gemeenskappe veilig te hou."