GPF help om kameras te koop
Stilbaai-gemeenskapspolisieforum en die plaaslike buurtwagte het onlangs hul gesamentlike projek om geld vir 'n veiligheidskamera in te samel, afgesluit.
Volgens Elize Claassens van die plaaslike polisie is die bedrag van R4 603 wat deur die verkoop van lootjies bymekaar gemaak is, aan Archie van Dyke van die Stilbaai Sekuriteitsnetwerk oorhandig. Drie gelukkige persone het ook elk 'n geskenkmandjie met kos ontvang.
Die nuwe kamera sal langs die wandelpad op Melkhoutfontein wat deur baie skoolkinders op pad na en van die skool gebruik word, aangebring word. Die dorp het reeds kameras by albei toegangsroetes.
Claassens sê egter die ingesamelde bedrag is ietwat minder as wat hulle beoog het en dis nie genoeg vir installasie ook nie. Enigiemand wat nog wil bydra kan https://gardenrouteandkleinkaroo. co.za/stilbaai-security-network-stilbaaisekuriteitsnetwerk/ besoek, of Van Dyke by 082 416 7279 kontak.