Boerehulp RSA vat ’n blaaskans
Boerehulp RSA het besluit om hul uitreikaksie tydelik te staak weens die inperkings van die Covid-19-pandemie, asook ‘n bietjie reën wat in dele van Boesmanland waar hulp verleen is, geval het.
Volgens Wilmer Muller is hul dankbaar dat hulle 14 vragte voer aan onderskeidelik Nous-Wes- en Pofadderboereverenigings kon skenk. Hulle het ook 164 omgeepakkies, verpak in 10 liter emmers, aan die boere en plaaswerkers van die twee boereverenigings uitgedeel. “Die boodskappe wat ons ontvang het, is werklik hartroerend en spreek van die diepe dankbaarheid van mense wat net nie meer hoop gehad het nie,” sê Muller.
Boerehulp RSA het aan die Helpende Hand-takke van Mosselbaai en George ook 25 kospakkies, ook in 10 liter emmers verpak, geskenk. Muller het GrootBrakrivier Spar bedank vir hul verpakking van 43 kospakkies wat aan Helpende Hand oorhandig is vir die verspreiding onder behoeftige gesinne.
Hy het sy besondere dank teenoor die NG gemeente van Outeniqualand, die Braambosbediening en die ywerige pakkers uit die gemeenskap uitgespreek wat so fluks gehelp het met die omgeepakkies, hul interne rekenmeesters vir die boekhouding, die boere van die Vrystaat wat voer geskenk het, asook die breigroepe van Malmesbury en Braambosbediening vir die donasies en die brei van die bidbeertjies en musse.
Muller bedank ook elke organisasie, besigheid en individu wat bygedra het tot die uitreikaksie. Spesiale dank is uitgespreek aan South Cape Engineering van George wat op eie koste vir ‘n voerstrooier, geskenk deur Chrisleo Botha, omgebou het na ‘n voermenger wat Boerehulp RSA aan die boere van Nous-Wes-boerevereniging, naby Kakamas, kon skenk.
“Ons is so dankbaar teenoor die Here wat die Boerehulp RSA-projek so mildelik geseën het dat ons iets vir ons naaste in nood kon bydra,” het Muller ter afsluiting gesê.