Boerehulp verlig die nood

Die Mosselbaai-tak van Solidariteit Helpende Hand het verlede Donderdag 43 kospakkies vanaf Boerehulp RSA ontvang.

Marlise Labuschagné, assistant streeksorganiseerder van Helpende Hand in die Wes-Kaap het die Boerehulp RSA-groep bedank vir die skenking. "Hierdie gebaar bevestig die vertroue wat Boerehulp RSA in Helpende Hand het om behoeftiges in die gemeenskap te help," het Labuschagné tydens die oorhandiging op Groot-Brakrivier gesê. Volgens haar is dit belangrik om te weet dat Helpende Hand diegene help wat streng deur ‘n formele assesseringsproses gekeur is. Wanneer ‘n assesseringsvorm voltooi is, word elkeen van hierdie gesinne individueel deur die maatskaplike werker van Helpende Hand gekontak om vas te stel of hulle moontlik méér as voedselhulp benodig. Daar word ook emosionele ondersteuning aangebied waar nodig.

"Omdat Helpende Hand probeer om op ‘n volhoubare manier te probeer uitreik, is dit belangrik dat die regte prosedures gevolg word. Hierdie proses maak dit moontlik om volhoubaar te help en daarom is dit soms moontlik dat Helpende Hand slegs een uit 10 gesinne help".

Enigiemand wat meer wil uitvind oor die werksaamhede van Helpende Hand en hoe mense daarby betrokke kan raak, is welkom om vir Labuschagné te kontak by marlise@helpendehand.co.za

Personeel van Spar in Groot-Brakrivier saam met verteenwoordigers van Helpende Hand tydens die oorhandiging van kospakkies deur Boerehulp RSA. Van links (agter) Hannes Pieterse (Spar), Wilmer Muller (Boerehulp RSA) en Wikus de Swardt (Spar). Voor: Desire Stevens (Spar), Sanet Greeff, Marlise Labuschagné, Marita Verwey en Magriet Potgieter, almal van Helpende Hand.