Blombos kry veiligheidskameras
Die effektiwiteit van veiligheidskameras in die bestryding van misdaad is reeds oor en oor bewys.
'n Paar inwoners van Blombos naby Stilbaai en donateurs het onder leiding van Blombosplaaswag saamgespan om ook die Blombos- en Vermaaklikheidpad met dié tegnologie te beveilig.
Vier kamerapunte en agt kameras is geïnstalleer. Vier van die kameras gebruik nommerplaatherkenning en die ander vier is oorsigkameras wat video direk na die beheerkamer stroom, waar dit opgeneem en gebêre word.
Volgens Archie van Dyke, voorsitter van die Stilbaai Sekuriteitsnetwerk (SSN) is die doel van dié projek om elke ingangspunt na Stilbaai, Jongensfontein, Melkhoutfontein en die landelike gebiede te beveilig. "Die nuutste kameras bring die totaal wat reeds aangebring is, op 26 te staan," sê hy.
SSN is 'n geregistreerde nie-winsgewende organisasie en maak op bydraes uit die gemeenskap staat. Die geld word nie net vir nuwe kameras nie, maar ook vir onderhoud en maandelikse kostes aangewend. Besoek https:// gardenrouteandkleinkaroo.co.za/ stilbaai-security-network-stilbaaisekuriteitsnetwerk/ vir meer inligting, of skakel Van Dyke by 082 416 7279.