Die boeke-vastrap vir oues
Biblioteekpersoneel mis hul meer senior besoekers só dat hulle ter viering van Mandeladag ‘n sang- en dansprogram by tehuise op Riversdal gehou het.
Ursula Oosthuizen, bestuurder van Hessequa-biblioteekdienste sê die idee, inhoud van die program en choreografie was alles personeellede se inisiatief.
Die groep het op Vrydagoggend, 17 Julie eers die inwoners van Jan Lange verras, waarna hulle die program by Ou Meule herhaal het.
Inwoners het in die wintersonnetjie oral in die tuin gesit terwyl Melanie Cloete die bestuurder van Riversdal-biblioteek en haar span gesing, gedans en voorgelees het.
Oosthuizen sê die gedagte agter die besoeke was om die bejaardes te verseker hulle word gemis. “Ons hoop ons sal hulle binnekort weer kan verwelkom om boeke uit te neem.”