Barmhartigheid verbaas
Anoniem, Mosselbaai:
'n Paar weke gelede het ek 'n hele aantal rekenaarmaatskappye in ons area per e-pos gekontak met die oog op ‘n ongebruikte of goeie prys tweedehandse skootrekenaar vir ‘n enkelouer wat direk as gevolg van Covid haar werk verloor het met die saamgaande probleem van huishuur wat agterstallig raak en dreigende uitsetting.
Sy het nog ‘n jong seun om voor te sorg en al oplossing is om 'n aanlynbesigheid te probeer waarvoor ‘n skootrekenaar noodsaaklik is. Dotcom Computers van Bayview Centre Da Nova was, behalwe vir slegs een ander maatskappy wat ten minste geantwoord het, is die enigste wat laat weet het dat hulle ‘n skootrekenaar beskikbaar gekry het vir ‘n goeie prys. Hulle was eerlik genoeg om te noem dat die hardeware goed is, maar dat die spoed nie te vinnig is nie.
Ongelukkig kon die dame dit nie bekostig nie en het ek na gebed en oorweging besluit om haar te help. Toe ek die rekenaar gaan afhaal het Marco van Dotcom aangedui dat hulle maatskappy gelei was om dit as skenking vir haar te gee. Dit was heeltemal onverwags. Kry ‘n mens nog besigheidsmense wat self deesdae swaarkry met soveel simpatie vir ander? Mag die Here hulle ook vergoed vir hierdie geleentheid om ‘n gesin wat regtig radeloos is, te help.