Ondersoek na ‘gasreuk’ onderweg
Die Tuinroete-distriksmunisipaliteit het verlede week met senior bestuurslede van PetroSA vergader nadat verskeie inwoners van Mosselbaai op Woensdag, 5 Augustus by die Mossel Bay Advertiser gekla het oor ‘n sterk "gasreuk" wat oor die dorp hang.
Dit is egter nie die eerste keer wat inwoners die koerant kontak met klagtes van hoofpyne, duisligheid en naarheid nie.
Inwoners van Danabaai, Heiderand, Aslapark en KwaNonqaba het gesê dit is ook nie die eerste keer wat hulle die reuk ruik nie. Hulle het op die betrokke Woensdag gekla oor onder meer naarheid en hoofpyne. Verskeie inskrywings is ook op sosiale mediaplatforms gemaak waar inwoners die onaangename reuk en die effek daarvan bespreek.
Die Advertiser het navrae aan die Mosselbaai-munisipaliteit oor die kwessie gestuur en 'n berig oor die klagtes op sosiale mediaplatforms geplaas. Die munisipaliteit het die navrae aan die Tuinroete-distrikmunisipaliteit gestuur.
Op Vrydag, 7 Augustus het die betrokke partye na aanleiding van die klagtes vergader. Woordvoerder van die Tuinroetedistriksmunisipaliteit, Herman Pieters sê daar is tydens die vergadering beslis dat die saak dringende aandag sal kry. “’n Tegniese komitee sal aangestel word waarvan die Tuinroete-distriksmunisipaliteit deel sal wees. Die oorsaak van die probleem sal vasgestel word.”
Pieters sê inwoners moet verstaan dat die proses wat by PetroSA gevolg sal moet word om die reukprobleem op te spoor, tydsaam kan wees. “PetroSA se bestuur is ten volle gewillig om die probleem op te los. Dit is prioriteit.”
Die oorsaak van die reuk bly tans 'n raaisel. Die Advertiser het navrae aan Pieters gerig waarin gevra word na wat die proses wat sal volg presies behels. Die Advertiser het ook navrae gestuur oor wat die impak van die reuk op inwoners se gesondheid is.
Intussen het PetroSA 'n verklaring uitgereik waarin hulle kennis neem van inwoners se klagtes. Woordvoerder, Tumoetsile Mogamisi sê daar was op Woensdag, 12 Augustus geen slegte reuk nie. "Ons werk saam met die Tuinroete-distrikmunisipaliteit en is deurlopend besig met monitering om die probleem vas te stel. Ons het ook intussen alle industriële prosesse wat aan die reuk gekoppel kan word voorlopig gestaak tot ons die antwoord het."
Mogamisi sê hulle is daartoe verbind om die gesondheid en welstand van werknemers, die gemeenskappe en die omgewing te op die hart te dra.
Die oorsaak van die reuk bly tans ‘n raaisel.