Fonds wil restaurante en kroeë help oorleef
Met besighede, restaurante en kroeë op hul knieë nadat Covid19-regulasies, soos die verbod op drankverkope en die aandklokreël wat die sakesektor lamlê, is verskeie plaaslike besighede nou op die rand van bankrotskap.
"Redding vir ons plaaslike besighede lê in die hande van die gemeenskap. Daarom is die Mossel Bay Covid-19-fonds gestig om nie net kos aan behoeftige gesinne te verskaf nie, maar ook om besighede en hul werkers in hierdie moelike tyd te kan help," sê Shaun Mouton, stigter van die fonds. Mouton het vandeesweek vergader met verskeie eienaars van restaurante en kroeë om die konsep van die fonds met hulle te bespreek.
Die hele konsep is gemeenskapsgedrewe en 'n maklike stelsel word gebruik op fondse te genereer. Restaurant-eienaars het tydens die vergadering die Mossel Bay Advertsiser meegedeel dat dit baie sleg met hulle gaan. Sommige oorweeg om hul besighede te verkoop en ander is weer in die proses om alles te verloor. Buiten die drankverbod en toerisme wat 'n knou gekry het, het agterstallige huur, salarisse, hulp aan werkers en TERS-betalings wat nie gerealiseer het nie, hulle in die rooi gedompel.
Met restaurante wel oop vir besigheid, het die gemeenskap ook nie meer geld om te gaan uiteet nie en boonop is baie steeds bang om restaurante te besoek. Die eienaars van restaurante en kroeë het egter tydens die vergadering Dinsdag, 11 Augustus die versekering gegee dat hulle die regulasies nougeset volg.
Volgens Mouton is 'n webtuiste geskep waar die gemeenskap bydraes kan maak om plaaslike besighede en die gemeenskap by te staan om te oorleef. Die webtuiste is gebruikersvriendelik en deur Payfast gedryf. Die Mossel Bay Covid-19-fonds se bankstate is volgens Mouton vir enigiemand, hetsy potensiële donateurs of lede van die gemeenskap beskikbaar vir besigtiging. Inligting waar aflaaipunte vir enige skenkings is kan ook op die webtuiste besigtig word. Vir kosdonasies kan www. mbcovid19fund.co.za besoek word. Vir hulp aan restaurante en kroeë kan https://mbcovid19fund.co.za/ saveourpubs/ besoek word.
‘Redding vir ons plaaslike besighede lê in die hande van die gemeenskap.’