Geliefde raadslid oorlede
‘n Raadslid van die Mosselbaaimunisipaliteit, Len Rauch (69) is op Dinsdag, 11 Augustus oorlede. Die oorsaak van sy dood is nog nie aan die Mossel Bay Advertiser bekend nie. Hy was na wat verneem word by sy huis.
Die munisipaliteit het in ‘n verklaring gesê Rauch het 'n onuitwisbare merk as lid van die munisipale raad gemaak en het sy plek as lid van die uitvoerende komitees op finansiële dienste, tegniese dienste, beplanning en geïntegreerde dienste, asook op die opleidingsen keurkomitees volgestaan. Hy was ‘n medestigter van een van die sterksgroeiende buurtwagte in Midbrak en baie betrokke by die belastingbetalersvereniging.
Uitvoerende burgemeester, Harry Levendal sê Rauch het as proporsionele verteenwoordiger vir die Demokratiese Alliansie (DA) in Wyk 7 diep spore getrap in veral die landelike gemeenskappe en het die wyksraadslid, Barnie Groenewald se hand in die wyk gesterk.
Voor sy gesin in die Mosselbaai-omgewing gevestig het, het Rauch eweneens as 'n leierfiguur in die mynbedryf, ook met opheffingswerk, baie gedoen.
Sy kollegas en vriende by Mosselbaai-munisipaliteit sê hulle sal Rauch altyd onthou vir sy gevatte sêgoed, sy wye lewenservaring waaruit hulle kon put, vir sy werklike omgee vir sy medemens en vir die wyse waarop hy ander se lewens aangeraak het sonder om dit aan die groot klok te hang. “Hy word onthou as ‘n baie deeglike persoon wat ondanks werksdruk altyd tyd vir ‘n grappie gehad het. Hy kon ondanks emosie, ruim en groothartig met sy medemens omgaan,” sê Levendal.
Rauch laat, benewens sy eggenote Jo, ook drie dogters en twee kleinkinders agter.