Mosselbaai het markte te kus en te keur
Die Harry Giddey-park is nie net die groen long van Mosselbaai nie, maar binnekort ook die adres van die “mark in die park”.
Op 31 Oktober is dit markdag in die Harry Giddey-park.
Die park bied ‘n unieke atmosfeer met reuse skadubome, ruim grasperke vir ‘n piekniek en wandelpaadjies vir oud en jonk om die omgewing te geniet. Die park se dierelewe kan ook besigtig word.
Mosselbaai-munisipaliteit nooi voornemende stalletjiehouers om reeds nou vir uitstalspasie aansoek te doen. Besoek gerus LED-kantore by die Goods Shed vir die aansoekvorm of skakel (044 606 5000). Aansoekvorms kan per e-pos teruggestuur word by sesau@mosselbay.gov.za
Aangesien dit ‘n opelugmark is wat aan die natuur elemente blootgestel is, sal inligting oor verwagte weersomstandighede wel kort voor die markdag aan uitstallers deurgegee word.
Die munisipaliteit sal musiek verskaf om die regte atmosfeer te skep, skoon ablusiegeriewe verseker, asook die nodige Covid-19-regulasies toepas. ‘n Sekuriteitswag sal ook aan diens wees. Daar is genoegsame parkering rondom die park.
Uitstallers moet reeds om 09:00 opgestel wees en moet bereid wees om tot 15:00 handel te dryf.
Hartenbos Boeremark
Hartenbos Boeremark met meer as 80 uitstallers se volgende markte is op 24 en 31 Oktober. Die markte vind vanaf 09:00 tot 14:00 by die Carney-gebou op Hartenbos plaas. Vriendelike uitstallers en jolige musiek. Markbesoekers moet asseblief te alle tye maskers dra. Navrae Charles (082 852 1773).
Goods Shed Markdag
Die Goods Shed se markdag vind weer Saterdag, 17 Oktober by The Goods Shed plaas. Daar sal snuffelstalletjies, vars-, vleisen kaasprodukte, asook gebakte produkte en ‘n groot verskeidenheid kosstalletjies wees. Daar is ook ‘n springkasteel vir kinders beskikbaar.
Vir meer inligting, kontak Christo (082 496 6316 of 044 695 2331).