Mosselbaaiers staan voor uitdaging
Mosselbaai se burgemeester, Harry Levendal het in ‘n nuusbrief die afgelope week gesê inwoners van die Tuinroete, en ook Mosselbaaiers, staan nou voor ‘n groot uitdaging om die huidige toename van Covid-19 aktiewe gevalle hok te slaan.
Dit volg op 'n week tot week vergelyking van statistieke deur die WesKaapse departement van gesondheid. Daaruit blyk dit dat Mosselbaai die grootste toename, 'n skrikwekkende 382% groei, in die distrik getoon het, met 201 aktiewe getalle wat op 18 November aangeteken is.
Levendal sê dit is bekommeringswaardig dat, anders as in baie ander dorpe, daar in Mosselbaai 'n lukrake verspreiding van die koronavirus voorkom en dat geen area uitgesonder kan word as 'n sogenaamde brandpunt nie. “Nie alle geïnfekteerde persone toon simptome nie en kan onwetend en niksvermoedend die virus versprei.”
Intussen het die Mosselbaaimunisipaliteit, in die belang van inwoners en personeel se gesondheid en veiligheid, besluit om persoon-totpersoon direkte kontak tussen die publiek en die beamptes in te kort deur personeel te vra om, waar moontlik, tuis te werk.
"Die ondervinding in die nasionale Covid-19-inperkingsvlakke 5/4/3/2 het bewys dat dieselfde uitstaande diensleweringsvlakke steeds gehandhaaf word, selfs al werk sommige personeel tuis. Inteendeel, van die personeel werk tuis selfs harder as op kantoor," sê Levendal.
Sommige afdelings, soos die lisensiehernuwingstoonbanke, die kassiere, die afdelings waar munisipale fasiliteite soos gemeenskapsale bespreek word en sportfasiliteite is steeds vir die publiek beskikbaar.
Levendal doen 'n beroep op die gemeenskap om die verspreiding van die virus te help voorkom.
"Die somervakansie is voor hande. Mosselbaai se ekonomie is baie afhanklik van toerisme en volgens aanduidings sal akkomodasie-instellings vanaf middel-Desember goed benut word. Inwoners, soos ook die besoekers, sal deurentyd bedag moet wees op die verspreiding van die virus en sal alles moontlik moet doen om dit te voorkom. Dra asseblief u masker, was gereeld u hande deeglik met seep, handhaaf die voorgeskrewe afstand en vermy sover moontlik plekke waar baie mense saamdrom."