Vrou brand dood in huis

‘n Vier-en-veertigjarige vrou is in die vroeë oggendure op 16 November in ‘n huisbrand op Groot-Brakrivier dood.

Die slagoffer is intussen geïdentifiseer as Esmerelda Muller.

Volgens die polisie het die woning by Greenhaven om ongeveer 03:00 aan die brand geslaan.

‘n Man en sy 17-jarige dogter, sy 10-jarige seun en ‘n baba van 11 maande oud kon daarin slaag om betyds uit die woning te ontsnap.

Die Groot-Brakrivier-polisie en die

Mosselbaai-munisipaliteit se brand-, redding- en rampbestuurdienste is na die toneel ontbied en het die brand geblus.

Kommunikasiebeampte van die polisie op Groot-Brakrivier, sers Laurianne Botha sê die gesin het alles in die brand verloor.

“Hulle het niks oor nie. Ons doen ‘n beroep op inwoners wat komberse, klere, skoene en ou huishoudelike items wil skenk, om my te kontak.” Botha sê inwoners van die gebied het hulle intussen oor die gesin ontferm en vir hulle tydelike huisvesting gebied.

Botha kan gekontak word (082 522 1682).