Vrae oor fonds
Die stigter van die Mossel Bay Covid-19fonds, Shaun Mouton ontken beskuldigings teen hom dat dié fonds 'n klug is. Dit volg op talle gerugte deur inwoners wat glo kaartjies in 'n gelukstrekking wat deur die fonds aangebied word, gekoop het.
In die trekking word inwoners aangemoedig om R250 per kaartjie te betaal en waarna hulle dan tydens 'n gelukstrekking 'n Nissan 370Z kan wen. Daar is glo slegs 2 500 kaartjies beskikbaar. Inwoners beweer egter nou op sosiale media dat Mouton die skenkings wat aan die fonds gemaak word, in sy sak steek.
Hy ontken die bewerings teen hom ten sterkste. Mouton sê hy het twee niewinsgewende organisasies gestig met die doel om besighede te ondersteun tydens die uitdagende Covid-19-pandemie en, om kos aan noodhebbendes te verskaf. Mouton is die direkteur van die fonds en het beheer oor die rekening. Hy sê die Mossel Bay Covid-19-fonds is geregistreer onder die nommer: 2020/183237/08. Die Small Business Relief-fonds word volgens Mouton nog nie gebruik nie. Hy het ook mense wat vir die fonds werk deur byvoorbeeld kos aan gesinne af te lewer.
Snuf in die neus
Mosselbaaiers het begin kriewelrig raak toe daar teen November steeds geen wenner vir die beloofde voertuig aangekondig is nie. Inskrywings is op sosiale media gemaak waar inwoners vra wat van die beloofde gelukstrekking geword het.
Wat dié omgekrapte inwoners betref, sê Mouton hulle vermoed dat 'n vrou wat op Facebook gekla het, iemand is wat 'n vals profiel geskep het. "Ons het nou al talle boodskappe na haar Facebookblad gestuur oor die negatiewe kommentaar jeens ons fonds, maar sy reageer nie." In 'n onlangse boodskap op die fonds se Facebookblad moedig Mouton inwoners steeds aan om vir die kompetisie in te skryf.
Daarin sê hy onder meer dat amper 1 000 inwoners 'n bedrag van ongeveer R176 000 geskenk het en dat 98% van die skenkers van Mosselbaai afkomstig is. Hy sê ook dat R30 000 reeds op uitgawes spandeer is om die kompetisiekoste te dek.
Die verwagte wenner van die voertuig sal volgens hom teen die einde van die vakansie aangekondig word. "Of vroeër as die kompetisiekoste gedek is."
Mouton sê die Nissan 370Z behoort tans aan 'n "besigheidsman wat dit beskikbaar gestel het". Hy sê hy het die name en inligting van alle skenkers en is bereid om die fonds se bankstate aan enigeen wat al geld geskenk het, beskikbaar te stel. Volgens Mouton is vier ander nie-winsgewende organisasies by die fonds betrokke, en help die organisasies sy fonds om Mosselbaaiers in moeilike tye te ondersteun.