R11 000 plus vir diere
Meer as R11 000 is op 7 November vir Caws 4 Paws en die Dierebeskermingsvereniging ingesamel. Caws 4 Paws is 'n nie-winsgewende organisasie wat vanuit Groot-Brakrivier na minderbevoorregte diere omsien.
Die fondsinsameling, Walk 4 Paws is by Klipheuwel duskant Klein-Brakrivier gehou. Besoekers het aan 'n pretstap saam met hulle honde deelgeneem en die toegangsfooi was 'n sak honde- of katkos, asook R50 per gesin.
Sowat 'n jaar gelede is 'n liefdadigheidskomitee deur Mosselbaaiers op die been gebring.
Lynette Nel (voorsitter) en Annemarie Dellemijn, Adine Hattingh, Barry Greyvenstein, Paul Möller, Amanda Engelbrecht en Cornelia Claassen het met insamelings begin wat hoofsaaklik uit artikels bestaan het wat inwoners nie meer in hulle wonings benodig het nie.
Die wit olifante uit skenkers se wonings het bo verwagting toegeneem en die komitee kon daarmee 'n versorgsingsoord vir mense wat terminaal siek is toerus met linne en gordyne.
Nood
Die liefdadigheidskomitee sê tans word tot 700kg kos maandeliks deur die dierebeskermingsvereninging (DBV) gebruik om honger troeteldiere op Mosselbaai te voer. Die Caws 4 Paws help dus die DBV om in 'n uitdagende tyd kos aan honger diere te verskaf. Die komitee bedank skenkers wat geldelik tot meer as R11 000 bygedra het . Caws 4 Paws is in 2010 deur bekommerde inwoners van Groot-Brakrivier gestig. Dit is hier, soos in al die ander plekke in die land duidelik dat daar 'n dringende behoefte aan welsynswerk in die plaaslike gemeenskap is. Hulle hoofdoel is om te verseker dat soveel as moontlik katte en honde gesteriliseer word om die aantal ongewenste en moontlik onversorgde rondloperdiere te beheer.
Hulle is, nes die DBV, van die Mosselbaaigemeenskap se goedhartigheid afhanklik.
Caws 4 Paws
Caws 4 Paws het met 'n toegewyde span vrywilligers uitgebrei wat gereeld die gemeenskap ondersteun deur troeteldiere te voer, te ontwurm, inentings te bied en om siek diere te behandel. Dit word met die ondersteuning van Groot Brak se plaaslike dierehospitaal, Croft, in samewerking met die Mosselbaai DBV en People's Dispensary for Sick Animals (PDSA) gedoen.