Polisie reik uit na armes

Talle gemeenskapslede is óf dieper in die kloue van armoede weens die Covid19-pandemie vasgevang, óf jare al in die greep van armoede.

Riversdal-polisie kyk egter nie verby hierdie mense se noodkreet om klere en kos nie, maar reik al vir twee jaar na soveel moontlik deur middel van skenkings uit. Volgens konst Venia Daries, kommunikasiebeampte staan dit as die Minderbevoorregte-projek bekend en word met sukses bedryf.

Die polisievoertuie het Vrydag, 6 November weer na van die gemeenskapslede gereis, nie om misdaad aan te spreek nie, maar om die lede se sosiale uitreikingsprojek voort te sit deur klere en kos te oorhandig.

Op De Draai-plaas was Susanna Pretorius oorstelp van vreugde toe Daries haar met die skenkings verras het.

Mense wat skenkings aan die polisie wil maak kan Daries skakel (028 713 8541).