Canibeat ‘n ware kanniedood

Met die aanvang van 2020 het ‘n groep jonges, waaronder wenners, deelnemers en beoordelaars van die jaarlikse Mossel Bay’s Got Talent-soektog, besluit om hulle kreatiewe kragte saam te span en Canibeat te vorm. Hulle strewe was om meer optreegeleenthede vir talentvolle jongmense in Mosselbaai te skep.

Die groep se visie is deur die Garden Route Casino se gemeenskapstrust ondersteun wat ‘n bydrae tot die aankoop van klanktoerusting gelewer het.

Hulle planne om hul eerste konsert op 26 Maart vanjaar te hou, is egter deur die nasionale ramptoestand verongeluk. Maar doodkry is min en die groep is weer volstoom besig om te repeteer vir hulle optrede in Desember. Die planne het ook nie net sommer gevlot nie, veral nie wat die bespreking van ‘n geskikte lokaal betref nie, maar die Lighthouse-saal in Uibreiding 13 sal vir die groep se eerste konsert op 15 Desember om 15:00 gasheer speel.

“Tans is ons besig om alle talent wat deel was van Mossel Bay’s Got Talent oor die jare weer te ontgin. Kinders raak verskriklik verveeld by die huis en wil hul talent wys. My slagspreuk is charity begins at home. Ons is ‘n familie en kan deur na mekaar om te sien, ‘n verskeidenheid behoeftes in die gemeenskap aanspreek. Dis waar Canibeat graag betrokke by wil raak,” verduidelik een van die stigterslede, Adrian London (078 245 8681).