Kampeerterreine streng vir Covid-19 gemonitor
Voornemende besoekers en dié wat reeds binne Hessequa-kampeertereine hul feestyd gaan geniet, kan hulle gereed maak om met valkoë dopgehou word of hulle Covid-19voorsorgmaatreëls gehoorsaam.
Die bestuurder van die streek se oorde, Albert Kleynhans het tydens Woensdag, 25 November se raadsvergadering die raadslede en senior amptenare meegedeel dat mense wat die voorsorgmaatreëls minag, gevra kan word om die oord te verlaat. Vakansiegangers wat hul plekke bespreek het om in die oorde te kampeer, sal ook nie gaste op ‘n dagbesoekbasis mag onthaal nie. By die ingang na die oorde sal rekord gehou word van besonderhede van besoekers wat hul blyplek daar bespreek en betaal het.
Kleynhans het ook gesê kampeerders moet by die ontvangs aanmeld waar alle gesinslede ‘n vraelys moet invul en hul temperatuur gemeet sal word. Indien dit meer as 37.3 grade is en hulle twee of meer Covid-19-simptome toon, sal hulle nie in die kampeerterrein toegelaat word nie. Slegs een gesinslid sal dan toegelaat word om die nodige dokumentasie binne die ontvangsgebied af te haal.
Indien enige vakansieganger tydens die feestyd binne die oord enige simptome toon, sal die betrokke vakansieganger buite die oord moet isoleer. Indien ‘n vakansieganger positief vir Covid-19 getoets word, moet dié persoon, asook almal op die betrokke kampeerblok die oord onmiddellik verlaat.
By swembaddens sal slegs 60 mense op ‘n keer toegelaat word en ook hulle sal alle nodige vraelyste moet invul en temperatuurtoetse ondergaan.
Ablusieblokke sal streng gemonitor word, met kontrakteurs wat die ablusieblokke sal monitor en ten minste een keer per dag met spesiale masjiene ontsmet. Hierdie personeel sal tussen 06:00 en 22:00 elke dag by die ablusieblokke aan diens wees. Slegs ‘n sekere aantal mense sal op ‘n keer binne die ablusieblokke toegelaat word.
Monitering sal ook op strande en swemplekke langs die strand plaasvind.