200 NUWE GEVALLE OORNAG
'n Spesiale raadsvergadering wat verband hou met die kommerwekkende stygende Covid-19-gevalle op Mosselbaai, is op Maandag, 7 Desember gehou. In slegs een dag het die syfer met 200 positiewe gevalle gestyg. Die raad het daarom strenger inperkings ingestel en is hul oogmerk hiermee om die potensiaal vir oordrag vir beide inwoners en personeel te verminder.
Die regering gee die Tuinroete 10 dae om die stygende getal Covid-19-gevalle onder beheer te bring, of moontlike drakoniese maatreëls sal volg. President Cyril Ramaphosa het as deel van sy politieke oorsig aan lede van die ANC se nasionale uitvoerende komitee gesê die situasie word gemonitor.
Intussen het die volle raad van die Mosselbaai-munisipaliteit die afgelope week strenger inperkings ingestel na 'n spesiale raadsvergadering wat verband hou met die stygende gevalle op Maandag, 7 Desember gehou is.
Die vergadering volg op 'n kommerwekkende styging in Covid-19 gevalle op Mosselbaai. In slegs een dag het die syfer met 200 positiewe gevalle gestyg. Die raad se oogmerk is om die potensiaal vir oordrag vir beide inwoners en personeel te verminder. Munisipale sportfasiliteite en biblioteke is vanaf Dinsdag, 8 Desember gesluit.
Virus is oral
Munisipale woordvoerder, Nickey le Roux het 'n beroep op inwoners en besighede gedoen om self verantwoordelikheid te neem om die virus te stop.
"Die probleem op Mosselbaai is dat ons nie 'n spesifieke brandpunt het nie. Die virus is oral. Mense moet wakkerskrik en besighede en inwoners moet tydens die vakansieseisoen verantwoordelik optree."
Le Roux sê indien die munisipaliteit aan die regering kan bewys dat hulle die stygende gevalle onder beheer kan bring, die moontlikheid van strenger maatreëls verminder. Intussen steier die ekonomie steeds weens die pandemie.
Mosselbaai se besighede het in ‘n groot mate verantwoordelik opgetree deur massa-byeenkomste te herskeduleer of af te stel. Die gewilde jaarlikse MossJazz-fees is die afgelope week afgestel. Die fees is na November 2021 uitgestel. Die Grootbrak Grabadoo en die Prince Vintcent Wine & Food Festival is ook van die baan en is voorlopig uitgestel.
Teen Woensdag, 9 Desember is 926 aktiewe gevalle op Mosselbaai aangemeld.
Neem verantwoordelikheid
Le Roux sê die probleem lê nie by vakansiegangers wat Mosselbaai besoek nie, maar by plaaslike besighede wat nie hul verantwoordelikheid ten volle nakom nie.
"Die individu moet ophou dink dat die volgende persoon voorkomend moet optree. Elke individu moet verantwoordelik optree." Reeds 106 mense is op Mosselbaai oorlede nadat hulle die Covid-19-virus opgedoen het en 4 085 inwoners het reeds die virus onder lede gehad.
Le Roux sê geen openbare optogte sal toegelaat word nie en geen byeenkomste op die strande is toelaatbaar nie. Twee markte, een by die Harry Giddey-park en ‘n ander in Wolwedans, Groot-Brakrivier sal wel steeds voortgaan.
"Hierdie markte sal voortgaan met die nodige voorkomende maatreëls wat streng toegepas sal word by beide die stalletjiehouers en besoekers," sê Le Roux.
Die Ek Lief Afrikaans-musiekfees sal ook voortgaan, maar slegs 250 besoekers word toegelaat. Organiseerder Eduard Hugo sê die pandemie het 'n enorme finansiële effek op die vermaaklikheidsbedryf.
"Kunstenaars kan nie optree nie. Ons gaan met die fees voort, maar net op 'n baie kleiner skaal. Ons wil ook verantwoordelik optree, so ons gaan die fees na 'n nuwe venue skuif."
Hugo sê die venue sal aangekondig word. Die fees vind vanaf 21 Desember tot 31 Desember plaas.
Aneli Gerber, operasionele bestuurshoof van Mosselbaai Toerisme sê besoekers kan steeds die omgewing geniet sonder om in beknopte ruimtes saam te kuier.
"Daar is kilometers mooi strande met oop spasie. Daar is wonderlike plekke om piekniek te hou. Op hierdie manier kan op 'n verantwoordelike wyse 'n inkomste vir die besighede gebied word."