Feesliggies word vanjaar ‘veilig’ aangeskakel
Mosselbaaiers sien jaarliks uit na die besonderse geleentheid wanneer die dorp se feesliggies amptelik aangeskakel word.
Vanjaar, in die lig van die uitdagings wat die jongste toename in Covid-19 aktiewe gevalle in die dorp meebring, is besluit om dié jaarlikse afspraak in die Harry Giddeypark effe anders te benader.
Met die vriendelike samewerking van die drie streekradiostasies bied die munisipaliteit steeds die amptelike aanskakeling van die feesliggies op Saterdag, 12 Desember vanaf ongeveer 19:00 aan.
“Vanjaar nooi ons die inwoners om egter op hul gunstelingradiostasie in te skakel om na die burgemeester se feesboodskap, asook vir die gebed vir die nooddienswerkers wat die feesseisoen voorafgaan, te luister,” nooi Nickey le Roux, munisipale woordvoerder.
Luisteraars kan op SFM Streekradio op 90.1 Fm vir die Mosselbaai en George omgewing en op 104.1 Fm vir Oudtshoorn en die Langkloof, inskakel.
EdenFM se luisteraars kan op 93.8 Fm Stereo, en vanuit die Klein Karoo op 103.6 Fm stereo, inskakel.
HeartBeatFM se getroue volgelinge kan gerus inskakel op Heartbeat 103.9fm of via die internet by Heartbeatfm.ndstream.net saamluister.
Die feesliggies sal oudergewoonte om 19:30 aangeskakel word. “Elke inwoner van die groter Mosselbaai word van harte uitgenooi om die onderskeie radiostasies se program te geniet in die aanloop tot die amptelike aanskakeling.”