Nuwe korrespondent, gesoute skrywer
Suid-Kaap Forum verwelkom ‘n nuwe korrespondent in ons midde, ‘n gesoute skrywer wie se skryfloopbaan oor 40 jaar strek.
Die Riversdaller Christiaan Johan de Swardt, wat bekendheid as CJ “die Loslit DJ” verwerf het, het in verskeie sfere van die joernalistiek en vermaakbedryf gewerk - van verslaggewer en teksredakteur by die dagblad Beeld en sosiale, jeug- en vermaakredakteur van die glanstydskrif De Kat, tot redakteur en uitgewer van die tweetalige jeugtydskrifte 2-21 en 21 Magazine.
Hy het ook in sy studentejare aan die destydse Randse Afrikaanse Universiteit as dramaturg, akteur en regisseur geskep en bekroonde stukke opgelewer. Hy was die kunsteredakteur by die kampuskoerant Die HeRAUt, redakteur van sy koshuis,
Drommedaris, se kwartaalblad Die Mishoring en die redakteur van die joolblad, Tjol’ 82.
CJ se eerste gediggie is op 10-jarige ouderdom in Laerskool Volschenk se koerantjie, Die Eseltjie gepubliseer. Hy het sy eerste kortverhaal, Die gevaarlike pakkie, op 12-jarige ouderom in die tienertydskrif Tina gepubliseer en het daarna ook kortverhale vir die tyskrifte Trompie, Patrys en Ons Bou geskryf.
Sedertdien verdien hy sy brood en botter en soms ook bietjie konfyt daarby, met die alfabet.
Hy het ook ‘n reeks konsep-CD’s saamgestel en sy konsepalbum, Boerejol, is met ‘n SAMA-toekenning bekroon. Hy het sy musiekrubriek, Oppinoot vir 30 jaar lank vir Vrouekeur behartig. Dié is in 2013, 2014 en 2015 met die Caxton Magazine Excellence Award in die afdeling beste resensent vereer. Hy spog met drie BASA-toekennings. Dit is die National Arts Festival/Business and Arts South Africa-toekenning vir kunstejoernalistiek. Hy het silwer toekennings in die afdelings Beste Profiel-artikel en Beste Resensie vir sy KKNK-oorsig ontvang. CJ is ook met die goue BASAtoekenning bekroon vir sy futuristiese, satiriese kommentaar in die afdeling Beste Kunstenuus-artikel – met die titel ‘n Moerse Klug.
Sy bydrae tot die bevordering van Afrikaanse musiek is met oor die 20 goue en platinum-toekennings deur verskeie platemaatskappye erken.
Met die koms van Covid 19 en die gevoglike korona-pandemie en die ingrypende gevolge daarvan in Maart vanjaar, het Caxton Publishing besluit om onder meer die tydskrifte Vrouekeur en Rooi Rose - vir wie Christiaan geskryf het - te sluit.
Baie welkom, Christiaan! Ons weet jy gaan baie waarde aan ons koerant toevoeg.