Mosselbaai finansieel volhoubaarste
Ratings Afrika, ‘n vooraanstaande graderingsagentskap het Mosselbaai wéér as die finansieel volhoubaarste plaaslike regering in Suid-Afrika beoordeel. Dit volg op ‘n soortgelyke gradering verlede jaar.
Die Wes-Kaap word ook weer as die bes-presterende provinsie gegradeer. Ratings Afrika het op Saterdag, 17 April sy jaarlikse munisipale finansiële volhoubaarheidsgradering vir die finansiële resultate van die 105 grootste plaaslike regerings en agt Metro’s in SuidAfrika gepubliseer.
Die gradering is gebaseer op ontledings van resultate vir die boekjaar wat in Junie 2020 geëindig het. Die puntemodel evalueer ses komponente, naamlik die bedryfsprestasie, likiditeitsbestuur, skuldbeheer, begrotingspraktyke, bekostigbaarheid en die infrastruktuurontwikkeling van ‘n munisipaliteit. Hierdie komponente word uit ‘n puntetotaal van 100 gradeer. Mosselbaai se telling van 74 plaas die munisipaliteit in die topposisie in die land.
Vier van die vyf munisipaliteite met die beste prestasie in Suid-Afrika is in die Wes-Kaap. Die munisipaliteite wat die hoogste punte behaal, het goed gevestigde finansiële beleide en hul begrotings is gebaseer op gesonde langtermyn finansiële strategieë. Volgens die verslag hou die munisipaliteite by goeie begrotingspraktyke, streng finansiële beheer en goeie inkomsteinvordering ondanks moeilike ekonomiese toestande.
Skoon oudit
Die uitvoerende burgemeester van Mosselbaai, raadsheer Harry Levendal het die Ratings Afrikagradering geprys. “Die gradering volg op die onlangse skoon ouditresultaat van Mosselbaaimunisipaliteit en is ‘n duidelike aanduiding van die toewyding en harde werk deur al die personeel. Ek bedank spesifiek die personeel van die direktoraat finansies, aangesien hulle vir geruime tyd sonder ‘n permanente finansiële hoof gefunksioneer het. Ek gee ook graag erkenning vir die waardevolle rol van ons direkteure en veral ons munisipale bestuurder, adv Thys Giliomee. “Die bestuurstyl van die munisipale bestuurder, wat van voor af lei en nie wegskram van die daaglikse uitdagings vir dienslewering nie, is ‘n navolgingswaardige voorbeeld vir ons personeel en ander plaaslike owerhede.”