‘Nie ‘n luukse, ‘n noodsaaklikheid’
Die Mosselbaai-munisipaliteit het op 16 April nuwe ablusiegeriewe in Titusstraat, D’Almeida oorhandig. Die projek is in samewerking met die provinsiale regering aangepak en daarop gerig om bejaardes en persone met gestremdhede se leefomstandighede te verlig deur ablusiegeriewe meer toeganklik te maak. Tans word 50 nuwe ablusiegeriewe gebou. Die uiteindelike oogmerk is om 250 soortgelyke fasiliteite binne die volgende 12 maande te voltooi. Die nuwe ablusiegeriewe is deel van huise, waar buitegeriewe voorheen voorsien is.
Uitvoerende burgemeester van Mosselbaai, raadsheer Harry Levendal het die loodsing van die projek en amptelike oorhandiging aan ‘n bejaarde vrou in Titusstraat bygewoon. Levendal het hom sedert 2006 beywer vir sodanige projek om ongelykhede van die verlede en inwoners van Mosselbaai se waardigheid te herstel.
“Hierdie geriewe is nie ‘n luukse nie. Dis ‘n noodsaaklikheid.” Levendal het ‘n roerende verwysing gemaak na die onwaardige ablusiegeriewe wat ‘n oom en tante van hom in die jare sestig moes gebruik en hoe dit ‘n impak op die huidige projek het.
“Die situasies uit die verlede lei ons na die toekoms.” Levendal het ook uitgestip dat die keuse om na die behoeftes van onder meer bejaardes eerste te kyk, daaruit spruit dat ouer mense in ‘n ander lig gesien moet word.
“Ons moet onthou dat húlle die land gebou het.”
Levendal het gesê dat sy termyn as burgemeenster einde se kant toe staan en het ‘n pleidooi gelewer dat die projek suksesvol deurgesien moet word. Hy het dit betreur dat oues van dae en gestremdes soms verder as 30m na ablusiegeriewe moet aansukkel.
Wes-Kaapse minister van menslike nedesettings, Tertuis Simmers, asook die burgemeester van die Tuinroetedistriksmunisipaliteit, raadslid Memory Booysen het die geleentheid bygewoon.
Simmers het gesê dat die aanbou van die ablusiegeriewe netjies binne die doelwitte van die Wes-Kaapse regering, naamlik werkskepping, die skep van veiliger gemeenskappe en die herstel van menswaardigheid, val. Hy het die Mosselbaai-munisipalieit geloof vir hulle dienslewering en gesê dat indien die munisipaliteit dit kan handhaaf, hulle kan verwag dat die Wes-Kaapse regering finansieel sal aanhou om hul projekte te ondersteun.