Munisipale werker het hart van goud
Waheed Kannemeyer, ‘n werknemer van die Mosselbaai-munisipaliteit, het nie twee keer gedink nie voor hy onbaatsugtig die tweede myl geloop het om seker te maak ‘n leerder kry sy skooltas propvol skoolboeke terug.
Vroeër vandeesmaand het Waheed, wat verantwoordelik is vir die munisipaliteit se sportvelde, op ‘n verlate skoolsak afgekom na die leerders reeds die sportterrein verlaat het. Sy kontak by Hoërskool Punt het nie die aand op ‘n selfoonboodskap reageer nie. Nietemin het hy seker gemaak dat die leerder die volgende oggend sy skooltas teruggekry het. “Ek het net gedink die kind het dalk sy boeke nodig. Ek het die skoolsak toe self skool toe geneem sodat die outjie weer sy sak en boeke kan kry,” het Waheed beskeie gesê.
Waheed is vir sy optrede op sosiale media deur Hoërskool Punt bedank.
Die uitvoerende onderburgemeester, raadsheer Dirk Kotzé, die munisipale bestuurder, adv Thys Giliomee en die direkteur van gemeenskapsdienste, Elize Nel het Waheed by die munisipale kantore ontmoet om hom vir sy weldaad te bedank.
“Ons is trots op jou, op die voorbeeld wat jy vir ander personeel en vir ons gemeenskap stel, en op die positiwiteit wat daaruit voortgespruit het. Jou optrede spreek van goeie burgerskap. Mense is moeg van die negatiwiteit wat so maklik lewens oorheers. Mosselbaai is die uitsondering en ons moet altyd daarna streef om selfs nog beter te wees,” het Kotzé gesê.
“Jou optrede het ons trots gemaak op die kaliber personeel in diens van die munisipaliteit,” het Giliomee bygevoeg.