Vervoerkwessie kwel ouers

Die Wes-Kaapse minister van onderwys, Debbie Schäfer het vroeër vandeesweek in ‘n radio-onderhoud aangaande leerders in die provinsie wat steeds op plasing in skole wag, berig dat die getal sedert die skooljaar begin het van oor die 13 000 na onder 5000 gedaal het. Sy het te kenne gegee dat die departement van onderwys (WKOD) steeds dringende aandag aan die probleem gee.

Plaaslik, het ouers in Sonskynvallei, Brandwag en Ruiterbos ‘n groep gevorm naamlik, Greater Brandwacht Matters, juis om veral kwessies soos leerdervervoer aan te spreek omdat dit kinders uit hierdie gemeenskappe verhoed om skool by te woon.

Omdat leerdervervoer na en van hierdie areas deur die Wes-Kaap onderwysdepartement gestaak is, is leerders aangewese op koshuisverblyf.

Die groep beskou die gebrek aan vervoer as ‘n wesenlike leerhindernis en het vandeesweek op Dinsdag, 20 April hulle eerste vergadering belê waarna lede van onder meer die beheerliggaam van Hoërskool Sao Bras genooi en teenwoordig was. Die vergadering is op Brandwag gehou.

Van die belangrikste besluite wat gedurende die vergadering geneem is sluit in om die behoefte aan ‘n leerdervervoerskema vanaf die drie spesifieke dorpe formeel aan die WKOD voor te lê. Die onderskeie skole betrokke se samewerking sal hierin gevra word. Die groep wil hierdie vervoerskema vir veral hoërskoolleerders binne die WKOD se bestaande regulasies beding. Hulle staan ook koshuisinwoning as ‘n gedwonge alternatief op leerdervervoer teen.

Volgens ‘n woordvoerder van die groep, is Chris Nissen van die Menseregtekommissie ook reeds genader om by die onderhandelingsproses betrokke te raak.