Paasvreugde danksy ‘n goeie spanpoging
‘n Plaaslike skool, die Rotariër-klub en die ATKV Langsoustak het opnuut tydens die Paastyd besef, dat om kragte saam te span die sleutel tot ‘n betekenisvolle impak in die gemeenskap is.
“In die lig en konteks van ons huidige omstandighede, veral wat die ekonomiese effek van die Covid-19-pandemie betref, is die nood groter en hulpbronne skaarser. Daarom is gekoördineerde samewerking so belangrik,” sê Claire du Plessis, voorsitter van die ATKV Langsoustak.
Du Plessis meen dat chroniese armoede, werkloosheid en voedseltekort ‘n bose kringloop skep. “Te midde hierdie omstandighede word nie-winsgewende organisasies met min opsies gelaat. Ons is dus genoop om hande te vat om ‘n breër impak te hê.”
Little Lighthouse-skool het deur middel van hulle skoolgemeenskap 9 000 Paaseiers ingesamel en die Rotariër-klub van Mosselbaai, wat jaarliks Paaseiers by verskeie instansies uitdeel, genader om dit te help versprei. Die Rotariër-klub het gedurende die grendeltydperk in 2020 projekte saam met die ATKV Langsoustak aangepak en so is die vennootskap met die uitdeel van Paaseiers vanjaar uitgebrei.
Deur hierdie netwerk is Paasvreugde by skole soos St Luke’s op Brandwag, Ridgeview Primêr, Sons and Daughters-, Tao-Tao- en Sunbeam-kleuterskole in Uitbreiding 8, Juweeltjie-kleuterskool in Uitbreiding 23, Huppelskool op Herbertsdale en Aloe-kleuterskool op Buisplaas beleef. Creating Effective Families in Mosselbaai, die sopkombuisnetwerk en by Benevolent Park het baat by hierdie netwerk se weldaad gevind.