Elke lied het ‘n storie
Indien jy gewonder het wat die storie agter volksbesitliedjies soos My nooi is in ‘n nartjie, Ek verlang na jou, Sonder jou en Sarah de Jager is, is die geleentheid waarop jy gewag het voor hande.
Die storie agter die lied bied ‘n uitmuntende produksie waartydens deurwinterde sanger en liedjieskrywer, Jan de Wet en die sangpaar, Coffee Snobs hul kreatiewe kragte saamspan. Voeg hierby die konsertpianis, Olive Sandilands en die multi-talentvolle Johan Engelbrecht op viool en dit word behoorlik ‘n genotvolle kragtoer.
Die kunstenaars het vandeesweek met die Mossel Bay Advertiser oor ‘n koppie koffie gesels en hulle opgewondenheid oor die produksie gedeel.
Jan, wat al die treffers hierbo genoem geskryf het, het saam met Vernette en Marius Wessels opgetree tydens ‘n Kersoptrede in 2019 en toe was daar reeds sprake van ‘n volgende Kersoptrede, wat vanweë Covid-19 in Desember 2020 nie kon plaasvind nie. Boonop het hy Coffee Snobs se produksie saam met Afrikaanse digter en skrywer, Riana Scheepers, Donkernagpantoen twee keer gesien. Dit het verdere moontlikhede vir ‘n gesamentlike optrede uitgespel.
Die daad is by die woord gevoeg en die eindresultaat is op 7 Mei in die Dias Museum te siene.
Jan, ‘n Suid-Afrikaanse gospel-ikoon vertel dat hy, alhoewel hy deur die jare talle sekulêre liedjies geskryf het wat deur kunstenaars soos Sonja Herholdt, Gé Korsten, Carike Keuzenkamp en ander opgeneem is, in sy studentedae laas self sekulêre musiek gesing het.
“Die vertoning is nostalgies en neem ‘n mens nogal down memory lane,” noem Marius.
Vernette voeg by dat dit ‘n puik kombinasie tussen oomblikke van heimwee en net lekker, ligte luistermusiek bied.
“Dis regtig ‘n mooi, goedvoel show, al moet ek self so sê. Daar is ook ‘n paar lekker inslag, soos Sonder jou wat in ‘n jazzy styl aangebied word.”
Die storie agter die lied word deur die Mosselbaai Kunstevereniging aangebied. Slegs 100 kaartjies is beskikbaar teen R150 (nie-lede) en R130 (lede). Kaartjies is beskikbaar by Abé Meintjes (083 268 3718). Die vertoning begin om 19:30. Deure open om 18:00.
Lidmaatskap aan die kunstevereniging kan by die konsert bekom word.
‘Dis regtig ‘n mooi, goedvoel
show, al moet ek self so sê. Daar is ook ‘n paar lekker inslag, soos Sonder jou wat in ‘n jazzy styl aangebied word.’