Pad word nie gesluit nie
Ons verwys na u artikel, Padsluiting uit R305 ontstel - Suid-Kaap Forum, 26 Maart.
Die volgende is die minder as 400 woorde van beswaar na aanleiding van u artikel wat u van ons vesroek het. U opskrif is misleidend en reflekteer nie die ware toedrag van sake nie.
Indien die aansoek om die pad se status te verander, suksesvol is, word dit verander in status van ‘n sekondere pad na ‘n privaat pad. Geeneen van die huidige gebruikers se toegang en regte word benadeel nie – van Riverside langs die rivier, die plaaseienaar tot die twee sakeondernemings, Inverroche en Press Room. Die pad word dus nie ‘gesluit’ soos beweer word nie.
Daar is oorweldigende steun vir die verandering – daar is geensins “ontsteltenis” oor die stap nie. Daar is net vier persone wat enigsins so “ontsteld” is dat hulle of kommentaar of besware ingedien het. Al die ander steun die stap anders sou hulle sekerlik die moeite gedoen het om kommentaar te lewer of beswaar aan te teken.
Die kennisgewings voldoen volkome aan die Paaie-department se verpligtinge – ‘n advertensie in ‘n plaaslike koerant en ‘n kennisgewingbord by die ingang. Bewerings van misleiding is ‘n belediging vir alle redelike mense.
Dit is verregaande en ‘n belediging vir die paaie-departement.
U bron het blykbaar die kennisgewing dadelik gesien – buitengewoon intelligent? Die redes vir die aansoek is i) Sekuriteit – baie gevalle waar inwoners bedreig is deur mense wat toegang langs die pad verkry. Daar was ‘n kaping van ‘n bejaarde in haar huis, bedreiging van personeel deur mense met messe en dosyne gevalle van diefstal van eiendom van inwoners.
ii) Dit maak net sin dat toegang vir die veiligheid van die hele gemeenskap beter beheer moet word.
iii) Die ondergeskikte pad word vir dekades lank nie meer gebruik vir die doel wat dit aanvanklik geproklameer was nie – naamlik as ‘n veilige deurgang deur die rivier.
iv) As ondergeskikte pad word dit nie gereeld deur die paaie-department onderhou nie. Dit dien ‘n baie klein gemeenskap.
Of ons dit wil weet of nie - daar is groter prioriteite elders.
U is op sleeptou geneem deur enkelinge wat waarskynlik eie belang en nie die van die groter gemeenskap nagestreef het nie. Die enkele besware sal volledig behandel word en die finale aanbevelings sal ‘n gelanseerde opinie bevat wat die meerderheid se belange sal verteenwoordig.