Bossie Boshoff vat voor by Hartenbos-jukskeiklub
Die jukskeiseisoen loop elke jaar einde Maart ten einde, maar vanweë Covid-19aktwiteite met sy eiesoortige uitdagings is die algemene jaarvergadering van Hartenbosjukskeiklub eers op 8 April gehou.
Faan Gerber wat vir die afgelope ongeveer 15 jaar die voorsitter van die klub was het halt geroep, maar sal steeds ingespan word as kontakpersoon met die Mosselbaaimunisipaliteit sodat die goeie verbintenis met die klub nie verwaarloos word nie. Die nuutverkose voorsitter, Bossie Boshoff het Gerber bedank vir sy diens oor ‘n lang tydperk.
Elna van den Berg,‘n nuwe inkomeling in Hartenbos is ‘n jukskeispeler van formaat en het Suid-Afrika reeds vir baie jare as Springbokspeler verteenwoordig. Met haar jarelange ervaring as sekretaris by die Universiteit van Pretoria is sy tot sekretaris verkies.
Die belangstelling vir die vergadering was bo verwagting met almal behalwe een speler teenwoordig, met die gevolg dat ‘n volledige gedifferensieerde bestuur verkies kon word.
Die gekose bestuur is soos volg: Bossie Boshoff (voorsitter en tesourier), Ewie Engelbrecht (ondervoorsitter en bystandtesourier), Elna van den Berg (sekretaris) en Sydney Stopforth (addisionele lid).
Keur-komitee: Bossie Boshoff, Elna van den Berg en Chris Viljoen. Media-skakelpersoon: Sydney Stopforth Verversingskomitee: Malie Pienaar, Elna van den Berg en Johan Brummer.
Terreinkomitee: Koot Swart, Louis Minnaar, Elias Burger en Buks Scholtz.
Skakelpersoon met munisiplaiteit: Faan Gerber.
Verskeie belangrike sake het onder die loep gekom en is met goeie oordeel bespreek en as uitdaging gestel tot realisering in die komende seisoen.
Die soeklig het veral op die uitbreiding van die spelertal geval. Daar is tans slegs 11 aktiewe spelers in die klub. Deur ope dae te organiseer waartydens elke aktiewe speler een meer persoon moet betrek word in die vooruitsig gestel.
Ten einde die sosiale klubs in die onmiddelikke omgewing te betrek om deel te hê aan geïntegreerde kompetisies waar Hartenbosspelers in spanne saam met sosiale spelers opgeneem word, kan meer jukskeidae gereël en spelers hul eie vaardighede behoefen en ook die spelertal en gehalte van spel verder uitbrei.