Hartenbos wen die bod
Die vreugdevure brand hoog in plaaslike toutrekgeledere nadat Suid-Afrika se bod om die 2026- wêreld toutrek kampioenskappe aan te bied, verlede week tydens Toutrek Internasionaal se virtuele wêreldkongres deur ‘n oorweldigende meerderheid aanvaar is.
Italië, Swede en Suid-Afrika is na ‘n skriftelike tenderproses aangewys as die drie lande op die kortlys om die wêreldkampioenskappe aan te bied. Hierdie drie lande het op die eerste dag van die wêreldliggaam, die Internasionale Toutrekfederasie (TWIF) se virtuele wêreldkongres wat op Vrydag, 16 April gehou is, hul onderskeie aanbiedings gedoen. Die aanbiedings is aangevul met promosievideo’s wat vooraf aan die lidlande versprei is.
Op Saterdag, 17 April het die lidlande gestem waarna Suid-Afrika die bod met ‘n tweederde-meerderheid gewen het.
Volgens Anton Botha, president van SA Toutrek het beplanning vir die toernooi reeds in 2019 begin toe die organisering s komitee vergaderings met die ATKV-bestuur en die Mosselbaai-munisipaliteit gehad het.
Met beide die ATKV-bestuur én die steun van Mosselbaai-munisipaliteit, het die gedetailleerde beplanning gevolg ten einde die tenderdokumente te voltooi en die promosievideo te vervaardig. Mosselbaai Toerisme se ondersteuning in hierdie verband was ook van groot waarde.
Die toernooi word beplan vir
9-12 September 2026, kort voor die skoolvakansie. Die hele ATKV-oord word vir die toernooi gereserveer, terwyl die Diaz
Hotel in Mosselbaai gereserveer word as die hoofkwartier, waar die Internasionale Toutrekfederasie se hoof uitvoerende komitee en tegniese beamptes sal bly.
Die toernooi self gaan in die amfiteater by Hartenbos aangebied word. Dit strek oor vier dae en sluit afdelings in vir mans, vroue, sowel as ‘n gemengde afdeling en die o/19- en o/23-afdelings in.
TWIF bestaan uit 74 lidlande, waarvan die top 20 toutreklande hier teenwoordig sal wees. Benewens sowat 1 400 atlete sal daar na verwagting ook ‘n verdere 2 500 tot 3 000 ondersteuners die toernooi bywoon.
SA Toutrek gaan ook ‘n uitreik-aksie loods deur plaaslike skole die geleentheid te gee om die eerste twee dae van die toernooi gratis by te woon. Die ATKV-oord gaan vir die duur van die kampioenskappe getooi word in vlae en baniere, soortgelyk aan die Olimpiese dorpe waar atlete gedurende die Olimpiese Spele gehuisves word.
Kaartjies sal spesifiek vir die plaaslike gemeenskap beskikbaar gestel word. Die toernooi word uitgesaai, terwyl ‘n TVprogram vir Supersport vervaardig gaan word.