Eden-atlete gekies vir span wat deelneem in Egipte
Eden spog met 11 atlete wat Suid-Afrika vanaf 12 tot 14 Junie by die UIPM werêldkampioenskappe in Kaïro, Egipte gaan verteenwoordig.
Dié 11 is deel van die groep wat vanaf 26 tot 28 Maart aan die SA Laserrun en Tetrathlon-kampioenskappe in Somerset-Wes by die Somerset Kollege deelgeneem en presteer het. Hulle is na afloop van hul deelname aan laasgenoemde kampioenskappe in onderskeidelik die SuidAfrikaanse Moderne Vyfkampvereniging, oftewel SAMPA- en SAMPA-presidentspan opgeneem.
Johan Windt, Ruan Rossouw, Bertus Myburgh, Tonya Schoeman en Rika Spang is in die SAMPA-span opgeneem terwyl Albert Myburgh, Pierre Myburgh, Hendrik Visser, Suné Visser, Ulene Visser en Eugene Nell die SAMPA-presidentspan gaan verteenwoordig.
Eden se atlete het behoorlik geskitter tydens die kampioenskappe in SomersetWes.
Johan Windt het weer eens ‘n goue medalje vir die WP 60+ -span ingepalm terwyl Hendrik Visser ook met ‘n goue medalje in sy ouderdomsgroep spog.
Eden atlete wat tot die WP-span verkies was het drie silwer en drie brons medaljes by die SA kampioenskappe verower.
Ruan Russouw, wat die sport vir die afgelope ses maande beoefen, se goue medalje is voor sy neus by die wenpaal weggeraap.
Ruan is gefokus en die werêldkampioenskappe gaan hom die geleentheid bied om weer vir sy goue medalje te veg. Zian Windt het ook ‘n silwer medalje gekry vir sy deelname in die Tetrathlon.
Laserrun is wanneer atlete tussen hardloop items soos ‘n 400m of ‘n 800m, met ‘n laserpistool na ‘n elektroniese teikens skiet.
Die skietafstande na die teiken wissel tussen 3 en 10m, afhangende van die ouderdomsgroep waarin gekompeteer word.