Adam in die paradys
Nes dit hoort, is Adam, ‘n 15-jarige leeu aan wie die Ubuntu Widlife Sanctuary boonop sy ontstaan te danke het, eerste vrygelaat toe hy en 11 ander groot katte Sondag, 23 Mei by hulle nuwe tuiste tussen Mosselbaai en Oudsthoon aangekom het. Ubuntu, voorheen in Noordwes, het sy bakens na die Wes-Kaap vir onder meer veiligheidsredes, verskuif.
Die organisasie is in 2015 gestig, in samewerking met internasionale rolspelers wat dieselfde visie deel – om ‘n veilige hawe te skep vir wild, veral die groot roofdiere wat voorheen in gevangenskap was. Van die diere is danksy ‘n wêreldwye ondersteunings netwerk uit haglike omstandighede vanuit Argentinië en die Oekraïne na Afrika waar hulle hoort, teruggebring.
Groot Trek
Ongeveer 50 mense het deelgeneem aan die diere se verskuiwing wat op Saterdag, 22 Mei begin het. Volgens Jurg Olsen, operasionele bestuurder van Ubuntu het die ondersteuning vir die projek hom stomgeslaan.
“Die woord Ubuntu het goedkoop geword, maar dis allesbehalwe goedkoop. Julle teenwoordigheid hier vandag, wys dat julle die gees van Ubuntu werklik verstaan,” het ‘n aangedaande Olsen Sondag gesê.
Die plaas waar Ubuntu gevestig is, is in die Outeniquaberge en grens aan CapeNature se grond. Slegs beheerde toegang is beskikbaar en dit is nie oop vir publieke toegang nie.
“Ek kan dit nie oor my hart kry om die diere bloot te stel nie. Hulle het die slegste kant van die mens gesien. Ek kan hulle nie verder laat uitbuit nie,” het Olsen by navraag aan die Mossel Bay Advertiser gesê.
Verdere ontwikkeling by die sentrum sluit sorg en rehabilitasie van renosterwesies in met die doel om hulle in die natuur terug te plaas.
Adam
Maryna van Wyk, voormalige joernalis vir Rapport, het ‘n besonderse verhouding met Adam. Sy het hom as ‘n paar weke oue welpie op ‘n teelplaas buite Bloemfontein ontmoet en daar het hulle storie begin. Van Wyk het ‘n groot gedeelte van haar joernalistieke loopbaan daaraan gewy om teelplase en die handel in leeubeendere te ondersoek.
Adam is die eerste leeu wat deur Ubuntu gered is. Volgens Olsen, het hulle Adam net betyds, ‘n dag voor hy vir sy beendere geskiet sou word, gekry.
“Hy het ‘n taai lewe gehad. Hy is ‘n teelmannetjie en al sy wyfies is voor hom vir hulle beendere doodgemaak.”
Adam het intussen ‘n wyfie, Eve gekry by wie hy baie gelukkig is. Van Wyk het die geleentheid aangegryp toe Olsen haar nooi om die “groot trek” mee te maak.
“Ek sien net ‘n gelukkige einde aan hierdie storie. Ek is ongelooflik bly dat hy hier by Jurg is, want ek weet hy gaan mooi na gekyk word. Hy’s nou in die paradys,” het Van Wyk aan die Advertiser gesê.