Bouers kom beloftes na
Na hulle besoek aan Groot-Brakrivier in Maart vanjaar, vir sommige van hulle ‘n eerste reis buite Kaapstad, was die span van Backyard Varsity soos belowe verlede week weer terug om lewens te verander.
Volgens Quinton Adams, bekend as The Shackbuilder en die stukrag agter dié besonderse opheffingsprojek, was die jonges vrolik en entoesiasties.
“Hulle het gesing in die stort en vroegoggend in die donker en koue by Suiderkruis gaan hardloop.
“Dis jongmanne en -vroue wat getipeer word as werkloos volgens die land se statistiek, maar alle jeug soek ‘n geleentheid, nét ‘n geleentheid.”
Adams, ‘n opvoedkundige sielkundige, skep deur middel van The Backyard Varsity ‘n unieke en relevante geleentheid vir vaardigheidgebaseerde opleiding. In der waarheid, is The Bakyard Varsity ‘n nuwe, praktiese kurrikulum vir jeug wat reeds die skool verlaat het.
“Die basiese vaardighede wat aangeleer word is projekbestuur, begroting, spanwerk, boukuns en leierskap. Maar ook hoe om sosiale kompleksiteit te vereenvoudig deur probleemoplossing. Uiteindelik, skep ons hierdeur ‘n nuwe tipe jongmens – sosiale entrepreneurs wat gemeenskappe en uiteindelik die land kan opbou.”
Adams verduidelik verder dat een van die redes is waarom werkloosheid so hoog onder jongmense is, is omdat hulle skole verlaat sonder die nodige vaardighede wat hulle indiensneembaar maak.
Voor die groep se terugkeer na Groot Brak, het hulle basiese vaardigheid s opleiding deurloop.
Die span het hulle werk in GrootBrakrivier voortgesit by die Ouplaas informele woongebied waar 23 gesinne in haglike omstandighede woon. Die groep het Sondag, 16 Mei begin en was voor die einde van die week weer vort. Deel van hulle informele opleiding voor hulle aankoms was om nuwe, veilige tydelike woonstrukture op te rig nadat die oues veilige afgebreek is.
Adams verduidelik dat die nuwe lede van syspan tydens die konstruksie proses gementor kon word deur die meer ervare lede.
“Dít insigself was ‘n leerskool, want ons kan nou bepaal watter rigting ons met opleiding en ontwikkeling moet inslaan.”
Volgens Adams is daar hoop om groot hoeveelhede jongmense op te lei, mits daar ‘n balans tussen die teoretiese en praktiese elemente van opleiding aangebied word.
“The Backyard Varsity se missie is duidelik. Ons wil ‘n weermag van vaardige, bekwame, uitstaande jongmense skep wat bereid is om opgelei te word om menslike waardigheid te help herstel.”
Hy beskryf die groep as “vreesloos, energiek en gewillig”.
“Hulle is great kids met mooi harte. Bouers van ‘n beter lewe – Shackbouers - hulle bou die land.”