Minister loof ‘ruggraat van landbou’
Die Wes-Kaapse LUR vir landbou, minister Ivan Meyer het op Dinsdag, 25 Mei die “ruggraat van die landboubedryf”, die eggenotes van landbouers en lede van die Vroue Landbou Vereniging (VLV) en damesklubs in die distrik, sy fokus gemaak.
In 'n blik op die ekonomie deur die lens van landbou, het Meyer dit duidelik gemaak dat die toekoms van Suid-Afrika se ekonomie in die landbou gesetel is. Hy het gemaan dat die regering hul ingesteldheid en benadering tot die landbou en landbouers moet verander.
"Luister na die landbouers, hulle is verantwoordelik vir die enigste sektor in die land wat ondanks Covid-19 steeds groei getoon het."
Die minister het na die vroue in landbou verwys as die hart en siel van die bedryf, die onontbeerlike rugsteun vir die rolspelers wat verantwoordelik is vir die kosmandjie van die provinsie, land en die res van Afrika.
Hy het verwys na die uitmergelende effek van die koronavirus deur klem te lê op die feit dat ook dit van verbygaande aard is.
Meyer het verskeie landbou-organisasies bedank vir die wyse waarop hulle deur welwillendheidsprogramme noodleniging tydens die Covid-19-inperkings bedryf het.
"Elke munisipale raad in Suid-Afrika behoort 'n raadslid te hê wat spesifiek na die belange van die landbou omsien. Organisasies soos die VLV moet gereeld met die burgemeester van hul dorpe skakel. Mosselbaai, die beste van 278 munisipaliteite in die land, is 'n toonbeeld van uitnemendheid en positiewe vooruitgang wat ook omgee insluit vir die belange van die distrik se landbouers."
Eetpatrone verander, vraag en aanbod verander en sentraal hiertoe is die landbou. Die bedryf het 'n beduidende groei getoon ondanks die effek van die drakoniese dekrete betreffende Covid-19, veral wat die drankverbod op die druiweboere in die WesKaap gehad het.
Daar is egter, vergeleke die internasionale ondervinding, geleenthede in die landbou opgesluit wat in Suid-Afrika nog verder ontwikkel kan word, soos landbou-toerisme en die tuisnywerheidbedryf wat ook deur die Wes-Kaapse departement van landbou met 'n mobiele toetssentrum ondersteun word. Die departement doen ook intensiewe navorsing wat tot voordeel van die bedryf aangewend word.
Belê in landbou-onderrig
"Die toekoms is in ons jeug. Een van die ministeriële prioriteite is dan juis om in landbou-onderrig te belê, nie net in landbouskole nie, maar ook om landbouvakke in gewone skole aan te bied. Leerders in landbouskole besef die waarde van lewe, hul uitkyk op die lewe verskil, hulle breek nie af en vernietig nie - hulle bou op."
Die Wes-Kaapse departement van landbou doen reeds heelwat om landbouers te ondersteun, met verskeie inisiatiewe betreffende landelike veiligheid en steun vir die plaasbuurtwagstelsels.
"Wanneer 'n landbouer vermoor word, is dit 'n aanslag op die ekonomie van ons land, op die broodmandjie van die res van Afrika wat deur landbouers in Suid-Afrika van kos voorsien word."
Mosselbaai se uitvoerende onderburgemeester, raadsheer Dirk Kotzé, het uitgebrei oor die inisiatiewe wat Mosselbaai-munisipaliteit neem ter wille van gemeenskapsveiligheid. Hy het ook die landbouers bedank vir die etlike plaasbuurtwagte in die distrik wat 'n sleutelrol in gemeenskapsveiligheid speel.
Die verrigtinge is bygewoon deur lede van sewe VLV-takke en damesklubs. Die byeenkoms, georganiseer deur raadslid Annatjie Janse van Rensburg was besonder goed bygewoon en die minister het sy dank uitgespreek vir die entoesiastiese gehoor.