Stilbaai groei met grasie
Die reuse-konstruksiewerk wat sedert Maart sommige strate in Stilbaai soos ‘n oorlogsone laat lyk het, is nie binnelanders wat kom vis soek of swembaddens bou het en bang is vir die seewater nie.
Dié grappie is Woensdag, 19 Mei vertel neffens die diep uitgrawings in sommige strate waar nuwe rioolpype ingesit word om die las van die verouderde asbestosrioolstelsel te help dra namate die inwonerstal groei.
Geen groei geskied sonder pyne nie en die prentjiemooi en rustige kusdorp is ook nie van die groeipyne gevrywaar wat noodwendig met vooruitgang en ontwikkeling gepaard gaan nie. Gelukkig is die tydelike ongerief wat inwoners in Disastraat en elders plek-plek sedert Maart ervaar, van korte duur en behoort hulle teen einde Junie met ‘n splinternuwe, doeltreffende rioolstelsel en ‘n nuwe teerpad te kan spog.
Volgens Martin Oosthuizen van die konstruksiemaatskappy Entsha
Henra in Mosselbaai, behels die rioolopgraderingswerk dat die nuwe rioolpype aanvullend tot die bestaande asbestosrioolpypleiding aangebring word om in die groeiende behoefte te voorsien - en natuurlik te voorkom dat Stilbaai nie ook in ‘n stinkende krotbuurt verval soos elders in die land gebeur weens gebrekkige dienslewering nie.
Die inwoners is vroegtydig in die saak geken en hoewel die geraas en versperde toegang tot hul huise irriterend en frustrerend is, verduur hulle dit met grasie en dankbaarheid, omdat hulle weet dit is noodsaaklike werk in hul eie belang.
Reëlings vir tydelike parkering is ook vroegtydig getref en die berge sand is spesiaal elders “gestoor” om die minimum ontwrigting en sand-irritasie te veroorsaak.
Volgens Oosthuizen behoort die nuwe pypleiding in Disastraat binne ‘n week voltooi en die uitgrawings opgevul te wees. Daarna sal ‘n nuwe teerpad bo-oor gebou word wat waarskynlik oor ‘n maand sal gebeur.
Intussen is ‘n span van die elektriese ingenieursmaatskappy Adenco ook besig om die kragvoorsieningsnetwerk in StilbaaiWes op te gradeer met nuwe hoogspanningkragen kommunikasiekabels wat tussen die substasie en mini-substasie aangelê word.
Dis nou om seker te maak almal het voldoende krag solank Eskom die liggies aanhou.