Klein-Brakrivier se pensie propvol
Verskeie inwoners van Klein-Brakrivier en vissermanne van oraloor kla oor die toestand van die pad van Powertown tot by die ontspanningsarea langs die KleinBrakrivier.
Die gebied wat egter onder water is na goeie reën die afgelope tyd, is ‘n kopseer vir veral booteienaars wat by die glybaan hul bote die water in wil laat. Die grondpad het so verweer en met die huidige watervlak van die rivier, raak dit al meer onbegaanbaar. Die rivier is tot op sy maksimum vol en die Mossel Bay Advertiser het verskeie klagtes hieroor ontvang.
Die komitee wat oor die meganiese oopmaak van die Klein-Brakrivier besin het Woensdag, 19 Mei vergader.
In ‘n persvrystelling sê die Mosselbaaimunisipaliteit hulle is bewus van die kommer onder sommige inwoners in die KleinBrakrivier-omgewing oor die heersende watervlakke van die rivier, veral gegewe die weerwaak vir moontlike reën in die aanloop tot die naweek.
Munisipale amptenare en verteenwoordigers van die KleinBrakrivierforum en die departement van omgewingsake en ander rolspelers was teenwoordig. Die departement het by die vergadering aangedui dat die huidige watervlakke van die rivier nie die dringende oopmaak van die riviermonding regverdig nie.
Maandag, 24 Mei is daar weer vergader en die owerhede het toegegee dat die ideale vlak vir die oopmaak van twee meter tot 1,8 meter verminder moet word. Selfs al sou hierdie vlak nie teen vandag, 28 Mei bereik word nie, sal die meganiese oopmaak van die rivier steeds toegelaat word. Die rivier sal dus vandag meganies oopgemaak word. Die werk sal omstreeks 07:30 begin en om ongeveer 15:00 afgehandel wees.
Die rivier se watervlakke sal fyn dopgehou word in geval van beduidende reën. Die
Mosselbaai-munisipaliteit het intussen die nodige gedoen om, indien nodig, die riviermonding binne sowat twee uur te kan oopmaak.
Veiligheidsreëlings
Die parkeerterrein by die Kleinbrakhoofstrand sal vir die duur van die werk vir die publiek gesluit wees om die veilige hantering van die swaar masjinerie moontlik te maak.
‘n Versperring sal om die bedryfsarea by die riviermonding gespan word. Die publiek word gemaan om nie verby dié versperring te beweeg nie - ook nie strandlangs nie. Omstanders word versoek om veiligheidshalwe liefs van die werksarea, waar swaar masjienerie gebruik sal word, weg te bly. Let daarop dat Covid-19inperkingsregulasies die samedromming van groot getalle mense uitdruklik verbied. Inwoners moet dus nie in groot getalle by die strand saamkom nie. Amptenare van CapeNature en die departement van visserye sal teenwoordig wees om toe te sien dat daar nie onwettig vis gevang word tydens en/of na die oopmaak van die riviermond nie.
Kontak die munisipaliteit by 044 606 5000 of 044 606 5121 of 044 606 5107 in geval van nood.