‘n Nuwe era vir Spar in Heiderand
Na sewe maande se stowwerige konstruksieproses wat dikwels met ongerief gepaardgegaan het, is die nuwe Spar Express by Shell Heiderand se deure nou wawyd oop. Dié Spar is egter nie net splinternuut nie, maar dit spog ook met ‘n konsep en ontwerpselemente wat ‘n eerste vir die Spargroep in Suid-Afrika is.
Tydens die geriefswinkel se amptelike opening op 20 Mei, was die lede van Spar se topbestuur in getalle teenwoordig om die groot oomblik saam te vier. Juis omdat hierdie winkel, die eerste tak is waar Spar hulle nuwe konsep geïmplementeer het.
“Ons het ‘n groot verwagting om te sien hoe hierdie nuwe konsep, wat ‘n vermenging van ‘n Quick Spar en ‘n Spar Express is, in die mark gaan vaar. Hierdie nuwe winkel stel beslis ‘n standaard wat nagevolg kan word,” het Conway Nesbitt, operasionele bestuurder van Spar verduidelik. Hy het ook genoem dat dit in die vooruitsig gestel word dat nog soortgelyke vennootskappe met Shell spesifiek op ander dorpe in die provinsie beoog word.
Nie net is die winkel 24 uur oop vir geriefsinkopies nie, maar die deli se kombuis op die perseel bied vanaf 06:30 tot 19:00 bedags keurige, vars kos. Koffieliefhebbers sal ook breed glimlag aangesien die Beantree Express ‘n uitstekende en geurige regmakertjie aan enigiemand op ‘n drafstap bied.
Johan Nel, mede-eienaar van Shell Heiderand, asook die opwindende Spar, sê dat die hooffokus van al hierdie nuwighede steeds hulle klante se behoeftes is.
“Met ons totale aanbieding, binne en buite die winkel, wil ons dieselfde belofte van uitnemendheid aan ons klante bied.”
Pieter Nel, algemene bestuurder van Shell Heiderand en die nuwe winkel, het te kenne gegee dat die opening van Spar vir hom ‘n besonderse groot dag is, juis omdat gereelde klante soveel geduld aan die dag gelê het tydens die konstruksieproses.
“Klante het ons gereeld gevra wanneer hulle weer die ou winkel gaan terugkry en dis wonderlik om iets soveel beter aan hulle te kan bied.”
Hy sê dat die Spar, volgens hulle navorsing, die ideale geriefsinkopie-ervaring bied aan klante wat byvoorbeeld onderweg na die skool of na buitemuurse aktiwiteite toe is, vir brandstof moet stop en ‘n paar benodighede moet aanskaf.
“Boonop,” voeg hy by, “is ons mensekapitaal een van ons grootste trekpleisters. Hier kan jy persoonlike diens verwag, binne en buite ons winkel. Ons mense is ons trots.”
Hy brei uit dat daar ook verdere planne is om selfs groter gerief vir klante wat die winkel besoek te skep. In die vooruitsig is parkering reg voor die winkel, sodat toegang vergemaklik kan word. Goeie beligting volg ook nog ten einde groter veiligheid te skep vir diegene wat na donker besoek.
“Kom kuier vir ons. Ons het werklik baie om te bied by ‘n nuwe winkel, geskep vir ‘n nuwe tyd.”
Spar Express is geleë op die hoek van Melkhoutstraat en Louis Fourieweg, Heiderand. Kontak hulle by 044 150 0049.
Foto: Steve D’Elboux