Melkies-leerders op Baxter se planke
Gedurende September verlede jaar het Melkhoutfontein Primêre Skool ‘n boodskappie van Rainbow Exchange in Kaapstad ontvang dat daar na ‘n paar kinders gesoek word om in ‘n opvoering op te tree.
Die stuk se naam is As Die See Byt en is deur Christo Davids van 7de Laanfaam geskryf. Dit handel oor ‘n groepie vissermanne wat hulle verhaaltjies vertel. Die hele proses is deur Rainbow Exchange, in samewerking met die Universiteit van Kaapstad gedryf.
In November is die stuk in die Melkhoutfontein-gemeenskapsaal opgevoer. En in Maart vanjaar het hulle die wonderlike nuus gekry dat hulle in die Baxter Teater in Kaapstad gaan optree waar ‘n DVD gemaak gaan word.
Hulle het dadelik aan die werk gespring en op hul eie by die skool begin oefen, onder die wakende oog van Tertia Jansen, ‘n onderwyser by die skool.
Vanaf 28 April tot 2 Mei was die hele groep in die Kaap bymekaar en het elke uitputtende dag van 09:00 tot 17:00 geoefen. Die DVD word nou eers in die vissersdorpies vertoon, waarna dit te koop aangebied sal word.
“Die wonderlike uitvloeisel van hierdie DVD is dat toe Abduragmaan Adams ‘n werkswinkel in Heidelberg aanbied, het baie kinders wat nooit in drama belanggestel het nie, dit bygewoon,” het Jansen gesê.
Dit wys ook, volgens haar, dat daar wel geleentheid vir kinders uit klein plattelandse gemeenskappe is om hulle merk op die groot verhoog te maak. – Johan Victor