Van Druten hengel weer eens Protea-kleure los
Emile van Druten, ‘n plaaslike hengelaar met diep wortels in Gouritsmond het tydens die 2021 nasionale kuns aas hengel kampioenskap op Loskop dam in Mpumalanga vir die 13de keer vir Proteakleure gekwalifiseer.
Van Druten het die Kaapse Wynland by die kampioenskap verteenwoordig en behaal ‘n algehele sesde plek as individu. Hy word dan ook in die nasionale spanne ingesluit wat moontlik later die jaar in Zimbabwe aand ‘n zone 6- kompetisie gaan deelneem, asook in 2022 by die Wêreld Spele in Amerika. Die nasionale kuns aas-hengel kampioenskap is deur SAALAA (South African Artlure Angling Association) aangebied. Dit is ‘n jaarlikse interprovinsiale kompetisie waar provinsies op verskillende damme en/of riviere mekaar die stryd aansê. Dit was al vele kere ook op plaaslike waters, soos die Breederivier in Witsand aangebied. Ander damme en riviere soos die Misverstanddam, Vaalrivier en Albert Falls was ook onlangs gebiede waar gehengel was.
Internasionale kompetisies sluit teen lande soos Namibië, Swaziland, Zambië, Malawië en Botswana in en die gekose Protea-hengelaars kan dan ook jaarliks aan die wêreldkampioenskap op internasionale waters in Europa, Amerika en dele van Asië en China meeding.
Van Druten het al in meer as 10 wêreldkampioenskappe gehengel en in ‘n verdere ses toetse teen Afrika-lande. Hy het as kunsaas-hengelaar lande soos Kazakstan, Noord- en Suid-Ierland, Engeland, Frankryk, Latvia, Rusland, Estonia en Ukraine besoek. Hy was ook deel van die Suid-Afrikaanse span wat in 2019 vyfde by die Wêreld Spele gekom het.
Hy skryf sy sukses in hengel toe aan sy passie daarvoor, harde werk en baie ondersteuning van sy familie en sy vrou.
“Hengel sluit verseker ook ‘n bietjie geluk in, maar geluk, by wyse van spreke, is daardie spesifieke oomblik waar voorbereiding en geleentheid mekaar ontmoet.”