Die oog agter die kamera
Nie net Mosselbaaiers nie, maar enige ander weetgierige wat van geskiedenis hou sal beslis baat vind by die nuwe YouTubekanaal, Memorable Mossel Bay.
Die Mossel Bay Advertiser het onlangs oor die projek berig, wat deur Erfenis Mosselbaai ondersteun word.
Attie Gerber, die filmmaker het die Advertiser meer oor sy indrukwekkende agtergrond, voor Mosselbaai sy nuwe tuiste geword het, vertel.
Televisie
Attie Gerber is in Port Elizabeth gebore en getoë. Hy gaan studeer Kommunikasiekunde (joernalistiek) op Potchefstroom en verwerf sy meesters- en doktorsgraad daarin. Tot en met sy aftrede in 2018, was hy ’n professor in videografie en dokumentêre fotografie aan die departement kommunikasiestudies by die Noordwes-Universiteit se Potchefstroomkampus.
"Ek het in die tagtigerjare klasgegee by die Randse Afrikaanse Universiteit en daarna as televisieregisseur by die SAUK gewerk. Ek en ’n vriend, Danie van der Walt, het die natuurprogram 50/50 in 1984 begin," vertel Attie. Later was hy die bestuurder van Afrikaanse TV-joernaalprogamme waaronder gunstelinge soos 50/50, Potpourri, Uit en Tuis en Kunskaleidoskoop geval het.
Tydens sy dosentskap op Potchefstroom, het hy steeds TV-vryskutwerk gedoen. Sy studente se dokumentêre rolprente het verskeie toekennings, ook internasionale pryse, ingepalm.
Fotografie
Sy liefde vir dokumentêre fotografie het tot twee koffietafelboeke gelei - een oor bobbejane (Bogom en sy Engelse vertaling Baboons – Tales, Traits and Troubles) asook ’n fotoboek (Stone from Heaven) oor die Vredefortkoepel wat gelyktydig in Afrikaans, Engels en Frans gepubliseer is. Die Koepel is ’n wêrelderfenisgebied waar die grootste en oudste meteoriet op aarde geval het.
Vanaf 2007-2011, het Gerber in opdrag van die Noordwes provinsiale regering jaarliks ’n glans fotokalender oor verskillende fasette van die Koepel gepubliseer.
In 2006 begin hy met ’n fotoprojek begin om leefwyses wat aan die uitsterf is te dokumenteer. Die fokusarea is die Kamiesberge in Namakwaland.
"Rondom hierdie tema het ek vyf solo fotouitstallings en twee groepuitstallings gehou. Dit was onder die sambreeltema Vanishing Lifestyles – Verdwene Leefwyses. In 2018 is ek deur die Suid-Afrikaanse regering gevra om saam met fotograwe van die BRICSlande (Brasilië, Rusland, Indië, China en Suid-Afrika) ’n uitstalling oor kulturele praktyke in die onderskeie lande te hou. Die uitstalling was in die William Humprheys Nasionale Kunsgalery in Kimberley. My eerste uitstalling was nietemin oor impressionistiese natuurfotografie wat heelwat makrofotografie ingesluit het."
Mosselbaai
Sy ervaring wend hy nou aan saam met Harry Hill en Carina Wiggill as deel van die Memorable Mossel Bay-projek. Hulle dokumenteer kultuurhistoriese elemente soos geboue, gebiede en praktyke.
"Ek is darem nie ’n vars inkommer op Mosselbaai nie, want my ouers het in die begin van die negentigs hierheen getrek. Ons het jaarliks hier vakansie gehou en stoere Mosselbaaiers tel onder my familie Dit is ’n voorreg om hier te bly."